Працоўная акцыя дала старт святкаванню 80-ГОДДЗЯ ВЫЗВАЛЕННЯ ШУМІЛІНСКАГА РАЁНА
20 кастрычніка на брацкіх могілках у вёсцы Дворышча Сіроцінскага сельсавета прайшла працоўная сельсавета акцыя, прысвечаная 80-годдзю вызвалення Шумілінскага раёна ад нямецка-фашысцкіх захопнікаў. У акцыі бралі ўдзел прадстаўнікі і ўлады, грамадскіх арганізацый, працоўных калектываў, вучні Слабадской базавай школы.
Тэрыторыі Мішневіцкага і Сіроцінскага сельсаветаў сталі першымі, што былі вызвалены ад фашыстаў восенню-зімой 1943/1944 года, нагадала старонкі гісторыі старшыня Сіроцінскага сельскага Савета дэпутатаў Аксана Шынкевич. На гэтай зямлі фронт спыніўся, і доўгія месяцы да пачатку аперацыі «Баграціён» у чэрвені 1944 года на сіроцінскай зямлі вяліся кровапралітныя баі, у ходзе якіх загінулі тысячы савецкіх салдат і афіцэраў. Толькі ў брацкіх могілках у Дворышчы (буйнейшых у раёне) пахавана больш за 2,5 тысячы воінаў 234-й стралковай Яраслаўскай камуністычнай дывізіі, 235-й стралковай Віцебскай Чырванасцяжнай ордэна Суворава дывізіі, 360-й Невельскай Чырванасцяжнай дывізіі.
У гэтым годзе на вайсковым пахаванні былі выдалены аварыйныя дрэвы, і пачалося добраўпарадкаванне могілак. Раней былі высаджаны маладыя елачкі, а ўдзельнікі акцыі пасадзілі туі, якія стануць часткай зялёнага аздаблення мемарыяла.
Таксама сёлета на могілках была ўсталявана пліта з імёнамі 60 воінаў, чые прозвішчы былі ўстаноўлены пры дадатковым вывучэнні архіўных дакументаў. Удзельнікі акцыі адкрылі мемарыяльную дошку з імёнамі яшчэ 80 воінаў. Такім чынам спіс пахаваных у Дворышчы савецкіх салдат дасягнуў 2573 чалавекі. І гэта не канчатковая лічба, бо работа па ўстанаўленні імёнаў савецкіх воінаў, загінуўшых пры вызваленні раёна, працягваецца. Намеснік старшыні райвыканкама Ірына Шалахава адзначыла важнасць таго, што ў акцыі прымаюць удзел школьнікі – гэта сведчанне пераемнасці пакаленняў, упэўненасці ў тым, што моладзь будзе ведаць праўду пра вайну і подзвіг савецкіх салдат.
Прысутныя ўшанавалі памяць загінуўшых воінаў хвілінай маўчання і ўсклалі кветкі да помніка.
Працоўная акцыя адкрыла мерапрыемствы па святкаванні 80-годдзя вызвалення Шумілінскага раёна і Беларусі. У лістападзе святочныя і памятныя мерапрыемствы пройдуць у Мішневіцкім сельсавеце.
Сяргей ЕРМАЛАЕЎ.
