Людзі тэлефануюць – улада адказвае і дапамагае
Дзевяць званкоў паступіла на «прамую лінію» да старшыні райвыканкама Мікалая Будневіча ў суботу, 25 красавіка. Людзі тэлефанавалі з самымі рознымі пытаннямі – ад арэнднага жылля і водаадвядзення да добраўпарадкавання і працаўладкавання.
Звароты паступалі з Шуміліна, Обалі, Амбросавіч, Светласельскага і Башней.
Жыхар аграгарадка Светласельскі ўзняў тэму арэнднага жылля былога райаграсэрвісу. Пасля ліквідацыі прадпрыемства юрыдычныя адносіны скончыліся, і людзі занепакоены магчымым высяленнем. Мікалай Будневіч супакоіў: нікога на вуліцу не выганяць, дагаворы па жыллёвых адносінах будуць падоўжаны з жыхарамі з улікам іх працы на дзяржаўных прадпрыемствах.
Шумілінцу, праз участак якога праходзіць каналізацыйная труба, што перыядычна псуецца, кіраўнік раёна паабяцаў разабрацца разам з «Водаканалам».
Жыхарка райцэнтра паведаміла, што не можа дамовіцца з камунгасам наконт замены каналізацыйнай трубы ў кватэры. Старшыня райвыканкама адзначыў, што жанчыне прапанаваны некалькі варыянтаў вырашэння праблемы. На момант выхаду газеты ў друк УП ЖКХ паведаміла, што заяўка выканана.
Яшчэ аднаго шумілінца хвалюе прасеўшы грунт пасля пракладкі кабеля РЭС у лістападзе. Начальнік раёна электрычных сетак паабяцаў ліквідаваць недахоп у найбліжэйшы час.
Тры званкі паступілі з Обалі, дзе цяпер ідуць маштабныя работы па добраўпарадкаванні. Адна з абальчанак пацікавілася, ці будзе асфальтаваная вуліца Камсамольская. Мікалай Будневіч пацвердзіў: работы запланаваны, дарожнікі ўжо пачалі асфальтаванне ў пасёлку.
Другая жыхарка пыталася пра магчымасць афармлення працоўных адносін на некалькі гадзін у дзень для дачкі. Старшыня райвыканкама растлумачыў алгарытм і параіў звярнуцца за кансультацыяй ва ўпраўленне па працы, занятасці і сацыяльнай абароне райвыканкама.
Абальчане ўзнялі праблему адключэння электраэнергіі ў гаражах, якія не ўзаконены і маюць парушэнні пажарнай бяспекі. Заяўніку патлумачылі, што трэба зрабіць для вырашэння сітуацыі.
Папрасіла парады жыхарка Амбросавіч: што рабіць, калі суседзі не чысцяць калодзеж лакальнай каналізацыі. Старшыня райвыканкама адзначыў, што сітуацыю вывучаць і пры неабходнасці падключаць санітарную службу. У той жа дзень работы былі праведзены.
Апошні званок паступіў з аграгарадка Башні – мужчына спытаў пра высечку аварыйных дрэў на могілках. Дырэктар УП ЖКГ Аляксей Шпакаў запэўніў, што работы правядуць у маі.
У выніку «прамая лінія» яшчэ раз паказала: людзі актыўна карыстаюцца магчымасцю напрамую звярнуцца да кіраўніка раёна. Усе агучаныя пытанні ўзяты на кантроль і будуць адпрацаваны ў вызначаныя тэрміны.
Алена КАРПУШЭНКА.
