Малады механізатар КУСГП «Ульскі» Уладзіслаў ІВАНОЎ сваё 25-годдзе сустракае на палетках.
Механізатар зранку прымае віншаванні – ад кіраўніцтва, калег, родных і сяброў. Можна сказаць, падарункам для хлопца стаў новенькі МТЗ‑3522, за якім ездзіў на Мінскі трактарны завод. Родам з Лявонава, шэсць гадоў таму Уладзіслаў вывучыўся на механізатара ў Ульскім ліцэі і прыйшоў у КУСГП «Ульскі» на адпрацоўку. Хлопец вырашыў для сябе, што застанецца тут працаваць. У пачатку сваёй працоўнай біяграфіі прасаваў сена, займаўся хімпраполкай, працаваў на камбайне поплеч з дзядзькам Аляксандрам Кляцковым, які стаў добрым настаўнікам для маладога спецыяліста.
Зараз Уладзіслаў Іваноў кожны дзень на палетках. Да свайго магутнага «Беларуса» мае тры адзінкі прычапной тэхнікі – дзевяцікорпусныя плугі, дзевяцімятровую барану і дзесяцімятровы культыватар. На гэтым тыдні працуе на палетках у Лявонаве – рыхтуе глебу да сяўбы кукурузы на сілас.
Уладзіслаў Іваноў не баіцца напружанага працоўнага рытму, дэманструе дастойны прыклад моладзі.
Ларыса КІСЯЛЁВА.
