Шоу, якое заваявала сэрцы
У Шуміліне выбралі «Міні-міс»
Пачатак лета ў Шуміліне выдаўся па-сапраўднаму гарачым! Міжнародны дзень абароны дзяцей быў бліскуча зафіналены святам дзяцінства, прыгажосці, таленту і бязмежнай фантазіі. У раённым цэнтры культуры 1 чэрвеня прайшоў конкурс «Міні-міс Шуміліна-2026». За галоўны тытул змагаліся 6 удзельніц ва ўзросце 8-10 гадоў з творчых калектываў РЦК і Шумілінскай дзіцячай школы мастацтваў.
Прэтэндэнткамі на перамогу былі Дар’я Ляхава, Паліна Базар, Марыя Лазука, Ксенія Шпыркіна, Марыя Мароз і Ганна Бурлакова.
Візітная картка «Я самая, самая» стала моцным стартам знаёмства з канкурсанткамі. Дзяўчынкі выходзілі на сцэну, расказвалі ў прозе, песнях і нават стэндапе пра сябе, свае поспехі, захапленні. Гледачы і журы адразу зразумелі, што вызначыць лепшую з гэтых чароўных стварэнняў будзе няпростай задачай. Менавіта так усё і адбылося: этап за этапам кожная з удзельніц атрымлівала ад журы вышэйшы бал.
Свае моцныя бакі юныя паненкі паказалі ў творчым нумары «Зорны час», а веды і хуткасць – у «Інтэлектуальным рынгу». Але для гледачоў самым відовішчным момантам, які выклікаў буру авацый, стаў паказ убораў са спадручных матэрыялаў і «Экадэфіле» ўдзельніц. Моднымі куцюр’е выступілі мамы канкурсантак. Першай на подыум выйшла самая інфармаваная мадэль паказу – Дар’я Ляхава ў сукенцы «Весніца роднага краю». Арыгінальны ўбор быў створаны са старонак газеты «Герой працы». Спадніца была зроблена з газетных палос, прыгожа складзеных у плісіраваныя валаны і вееры. А топ складаўся з некалькіх аднолькавых лагатыпаў-назвы любімай раёнкі. Паветраную і далікатную сукенку прадэманстравала Паліна Базар. Яе ўбор быў зроблены з простых папяровых сурвэтак. Сотні далікатных пышных бутонаў ружачак стваралі эфект лёгкасці, нібы гэтая выдатная прынцэса толькі што сышла са старонак казкі. У вобразе фатальнай і стыльнай красуні выйшла на сцэну Ксенія Шпыркіна. Яе сукенка было зроблена з чорных цэлафанавых пакетаў. Матавая строгасць ізастужкі і гумавыя пальчаткі таксама чорнага колеру ператварылі смелы нарад ва ўтылітарную рэч – сапраўдны сімвал авангарду. У касмічнай сукенцы будучага з залатой фольгі на подыуме з’явілася Марыя Лазука. Нарад блішчаў на святле, як расплаўленае золата, ствараючы зачаравальны эфект. У сукенку «Воблака клопату» прыйшла на паказ Ганна Бурлакова. Эксклюзіўны паветраны ўбор быў выкананы з надзьмутых аднаразовых пальчатак. Фантастычны 3-D аб’ём мякка спружыніў пры кожным кроку, а кожная дэталь увасабляла далікатныя мамчыны рукі, якая з’яўляецца практыкуючым медработнікам. Марыя Мароз завяршыла паказ дэфіле ў патрыятычнай сукенцы «Беларусачка». Гэта быў сапраўдны шэдэўр ручной працы, створаны з пластмасавых шкляначак і талерак. Гарсэтам сукенкі стаў пакет Белкаапсаюза з сімволікай нашай краіны.
Нотку гумару, а дзесьці і недзіцячага драйву спякотнаму вечару дадаў выхад «У матуліных уборах». Юныя модніцы прымусілі ўсю залу захапляцца сваім магутным жаночым пачаткам, уменнем хадзіць на высокіх абцасах і ўпрыгожваць сабой гэты свет.
Кульмінацыяй насычанага святочнага дня стала раскрыццё галоўнай інтрыгі лета – абвяшчэнне пераможцы і ўзнагароджанне ўдзельніц конкурсу «Міні-міс». Пасля доўгіх абмеркаванняў прадстаўнік ад складу журы, дырэктар Шумілінскай дзіцячай школы мастацтваў Алена Сцяпанава ўрачыста агучыла вынікі і павіншавала ўдзельніц. Кожнай з іх быў прысвоены ўнікальны тытул: «Міс Грацыя» стала Дар’я Ляхава, «Міс Усмешка» – Паліна Базар, «Міс Талент» – Ксенія Шпыркіна, «Міс Арыгінальнасць» – Ганна Бурлакова, «Міс Зачараванне» – Марыя Мароз.
Галоўны тытул заваявала Марыя Лазука – яна і прымерыла карону «Міні-міс Шуміліна-2026».
«Я нават і не думала пра перамогу. Калі назвалі маё імя, я спачатку спалохалася, а потым адчула, як забілася маё сэрцайка, і я вельмі ўзрадавалася. Гэтага ўсяго не было б без падтрымкі маіх блізкіх і сяброў. Я ўдзячная сваёй маме, Вольчыку (цётачцы Вользе Вішняковай), калектыву Дома культуры і маёй самай лепшай групе падтрымкі – калектыву «Пчолкі», – падзялілася пераможца.
Зала не пераставала пляскаць у далоні маленькім зорачкам, а яны хацелі хутчэй разгледзець падарункі. Спонсарамі конкурсу выступілі: раённая арганізацыя РГА «Белая Русь» (Ірына Шалахава); раённая арганізацыя «Беларускага Фонду міру» (Людміла Шаўцова); Шумілінскі раённы цэнтр культуры (Кацярына Сідарэнка), раённая арганізацыя РГА «Беларускае таварыства Чырвонага Крыжа» (Таццяна Казакова), пярвічная прафсаюзная арганізацыя работнікаў аховы здароўя (Зінаіда Сцержанкова); раённая арганізацыя Беларускага прафсаюза работнікаў культуры, інфармацыі, спорту і турызму (Алена Сініцкая); ФАЦ, індывідуальныя прадпрымальнікі Дар’я Навуменка (фотастудыя «Фокус»), Андрэй Мазанкоў (салон «Фота+»), Таццяна Барадзюля (магазін «Ёршык»), Дзмітрый Карась (магазін «Кітадэль»), Васіль Васілеўскі (магазін «Эдэльвейс»).
Дар’я ЧАПУРНОВА
