Мак расце на ўчастку – чакай штраф ці нават тэрмін
З 1 чэрвеня па 15 верасня ў Беларусі праводзіцца спецыяльная праграма «Мак», накіраваная на выяўленне і знішчэнне незаконных пасеваў наркаўтрымліваючых культур, а таксама спыненне каналаў іх пастаўкі.
Супрацоўнікі міліцыі праводзяць рэйды па дачных участках, палях і прыдамавых тэрыторыях, глядзяць, ці растуць мак і каноплі. Гутараць з людзьмі, папярэджваюць пра адказнасць, тлумачаць, што пасевы маку – прынада для наркаманаў. І такія ўсходы трэба вырваць, пакуль яны не зацвілі.
«Уладальнікі агародаў і прыдамавых участкаў нясуць адказнасць за вырастанне нарказмяшчальных раслін, нават калі яны з’явіліся там самі, без ведама гаспадара, – нагадвае оперупаўнаважаны крымінальнага вышуку Валерый Махноў. – Згодна з арт. 17.1 Кодэкса Рэспублікі Беларусь аб адміністрацыйных правапарушэннях незаконны пасеў або вырошчванне без мэты збыту караецца штрафам да 20 БВ. Калі будзе даказана, што расліны вырошчваліся з мэтай рэалізацыі або вырабу наркотыкаў, наступае крымінальная адказнасць. У залежнасці ад цяжару злачынства і складу групы парушальніку можа пагражаць пакаранне ад штрафу або арышту ажно да пазбаўлення волі на тэрмін да 15 гадоў з канфіскацыяй маёмасці».
Пра ўсе выпадкі макавых агародаў-градак можна ананімна паведамляць у РАУС па тэлефоне 102.
Ларыса КІСЯЛЁВА.
