Обальская цэгла заваёўвае расійскі рынак
Обальскі керамічны завод – адзін з беларускіх вытворцаў, які не толькі захаваў савецкія традыцыі якасці, але і пайшоў далей: аўтаматызацыя, новыя матэрыялы, экспансія ў расійскія рэгіёны.
Пры гэтым цана за штуку вышэй, чым у мясцовых расійскіх заводаў, але попыт не змяншаецца.
ОКЗ нядаўна выйшаў на праектную магутнасць – 2,6 мільёна штук цэглы ў месяц. І што важна – прадукцыю разбіраюць фактычна з колаў. Да 65% обальскай прадукцыі сёння ідзе на экспарт – у Расійскую Федэрацыю. Асноўныя рэгіёны пастаяннага попыту – Белгародская, Курская, Мурманская, Архангельская вобласці, а таксама Данецк. Аднак кіраўніцтва завода не спыняецца на дасягнутым.
– Мы паспяхова выйшлі на маскоўскі рынак, – расказвае намеснік дырэктара па развіцці Аксана Скамарохава. – Акрамя таго, вельмі перспектыўным аказаўся архангельскі напрамак. Пасля ўдзелу ў будаўнічай выставе ў Санкт-Пецярбургу да нас звярнуліся прадстаўнікі з Карэліі. Там набылі чыгуначны вагон эксперыментальна – і цяпер разлічваем на далейшае супрацоўніцтва.
Асабістая стратэгія: ездзіць і дамаўляцца
Кіраўніцтва ОКЗ вызначыла для сябе правіла: не сядзець на месцы. Спецыялісты і непасрэдна дырэктар асабіста выязджалі ў розныя рэгіёны Расіі.– У нас былі камандзіроўкі ў Архангельск, Курск, Бранск, Данецк, – кажа дырэктар завода Сяргей Ляўшоў. – Мы не проста рэкламавалі сваю прадукцыю – мы заключалі канкрэтныя дагаворы. Гэта дазволіла замацавацца на новых рынках. Такі падыход дае вынік: у рэгіёны, дзе пабывала кіраўніцтва, пастаўкі ідуць рэгулярна, і завод мае новых пакупнікоў.
Якасць заўсёды даражэй
На расійскім рынку склалася цікавая сітуацыя. Обальская цэгла каштуе 22 расійскія рублі за штуку. Для параўнання, Ліпкаўскі керамічны завод прапануе цэглу па 16,5 рубля, Тульскі цагляны завод – па 17. Розніца адчувальная. І тым не менш будаўнікі выбіраюць больш дарагі варыянт.
– Бяром якасцю, – працягвае Сяргей Ляўшоў. – Наша цэгла вытрымлівае да 100 цыклаў марозастойкасці. Гэта сур’ёзны паказчык, асабліва для рэгіёнаў з халодным кліматам. Акрамя таго, мы маем высокія паказчыкі трываласці.
Адкуль такія характарыстыкі? У сучасных тэхналогіях.
Аўтаматызацыя замест «на вока»
Нядаўна на керамічным прайшла маштабная мадэрнізацыя.
– Мы правялі аўтаматызацыю вытворчасці, – дадае Аксана Скамарохава. – Цяпер якасць адсочваюць не толькі людзі, але і электроніка. Сістэмы кантролю працуюць на кожным этапе – ад падрыхтоўкі сыравіны да ўпакоўкі гатовай прадукцыі. Вынік відавочны: колькасць браку значна скарацілася, на выхадзе – стабільна якасны тавар. Гэта дазволіла не толькі падтрымліваць высокія стандарты, але і выходзіць на рынкі з павышанымі патрабаваннямі.
Обальскі керамічны не спыняецца на дасягнутым. У вытворчасці ўжо выкарыстоўваюцца нестандартныя кампаненты.
– Мы дадаем у цэглу нафтавы кокс і торф, – кажа Сяргей Ляўшоў. – Гэта павышае якасць гатовага вырабу. На звычайнай прадукцыі мы не спыняемся. Акрамя таго, з Расіі закуплена спецыяльная тугаплаўкая гліна. Плануем выпускаць цэглу з яшчэ больш высокімі характарыстыкамі. І, што важна, яе кошт будзе ніжэй, чым у расійскіх аналагаў. Бо вытворчасць у нас аўтаматызаваная. А ўлічваючы, што попыт на такую цэглу ўжо ёсць, перспектывы выглядаюць вельмі аптымістычна.
Індывідуальны падыход да пакупніка
Обальскі падыход да продажаў – арыентацыя на пакупніка ва ўсім.
– Уся наша прадукцыя ўпакавана ў фірменную плёнку, – расказвае Аксана Скамарохава. – Мы прапануем розныя варыянты адгрузкі: з паддонам ці без. Гэта зручна для розных катэгорый кліентаў – ад буйных будаўнічых кампаній да дробных заказчыкаў. Тое, што цэгла не залежваецца на складах, – не выпадковасць, гэта заслуга маркетынгу, наша гатоўнасць ісці за патрэбамі спажыўца.
Погляд у будучыню
У планах – новыя віды прадукцыі, яшчэ больш глыбокая аўтаматызацыя і пашырэнне прысутнасці на расійскім рынку.– Мы ўжо замацаваліся ў Цэнтральнай Расіі, выходзім на Поўнач, працуем з паўднёвымі рэгіёнамі, – рэзюмуе Сяргей Ляўшоў. – Пры гэтым наша галоўная перавага – якасць і тэхналогіі. Мы ўкараняем навацыі, каб прапаноўваць лепшае. І рынак гэта адчувае.– Сёння обальская цэгла – гэта брэнд, які асацыюецца з надзейнасцю, – дадае Аксана Скамарохава. – І мы будзем гэты брэнд умацоўваць.
Аляксандр ШЭДЗЬКО.
