Гульня вучыць ратаваць
Лагер «Пунсовы ветразь» у Лескавічах наведалі ратавальнікі, каб ператварыць канікулы ў яркую прыгоду з важнай місіяй – навучыць дзяцей берагчы сябе.
Квэст «Шыфр бяспекі» адразу захапіў дзяцей: рэбусы, загадкі, спартыўныя выпрабаванні, камандная работа – усё ў адной віхуры. Рабяты ўспаміналі, якія грыбы небяспечныя, як паводзіць сябе ў лесе і на вадзе, як правільна выклікаць дапамогу. А калі справа дайшла да прымеркі баявога адзення на хуткасць, эмоцыі зашкальвалі – кожны хацеў адчуць сябе сапраўдным ратавальнікам.
На беразе Лескавіцкага возера прыгоды прадоўжыліся. Ратавальнікі і матросы таварыства ратавання на водах паказалі, як дзейнічаць на вадзе, калі побач здарылася бяда. Дзеці вучыліся кідаць выратавальны круг – спачатку гуляючы, а потым ужо ўсур’ёз, з азартам і бляскам у вачах.
У фінале дзеці атрымалі яркія памяткі – маленькі напамін пра тое, што лета павінна быць не толькі вясёлым, але і бяспечным.
