26 жніўня ў Шуміліне прайшла традыцыйная жнівеньская педагагічная канферэнцыя. Яна насіла не проста справаздачны, а па-сапраўднаму стратэгічны характар. Тэма сустрэчы – «Развіццё сістэмы адукацыі раёна: выклікі, стратэгіі, перспектывы» – стала сур’ёзнай размовай пра тое, чаго мы дамагліся і куды рухацца далей.
Начальнік аддзела па адукацыі райвыканкама Аксана Талстая задала тон, пазначыўшы галоўны прынцып: якасць жыцця і якасць адукацыі – звёны аднаго ланцуга. Інвестыцыі ў адукацыю сёння працуюць на эканоміку, здароўе нацыі і сацыяльную стабільнасць заўтра. Яе даклад быў прывязаны да шасці прыярытэтаў сацыяльна-эканамічнага развіцця Віцебскай вобласці на 2026-2030 гады – ад патрыятычнага выхавання і лічбавізацыі да турыстычнага патэнцыялу і ўмацавання рэгіёнаў. І ў кожным з гэтых напрамкаў адукацыя адыгрывае ключавую ролю.
У ходзе дыскусіі выступаючыя гаварылі не абстрактна, а на канкрэтных прыкладах. Вострыя тэмы – патрыятычнае выхаванне з дашкольнага ўзросту, укараненне штучнага інтэлекту ў вучэбны працэс, роля класнага кіраўніка як звяна паміж школай і сям’ёй, якасць ведаў ва ўмовах новых выклікаў.
Старшыня раённага Савета дэпутатаў Руслан Матвейчук заклікаў педагогаў да пастаяннага прафесійнага росту і перадаў віншаванне з новым навучальным годам ад кіраўніцтва раёна.
Сваё благаславенне настаўнікам даў і настаяцель Свята-Ануфрыеўскага храма айцец Уладзімір Пучынскі.
Традыцыйным і значным стаў момант ушанавання ветэранаў педагагічнай працы. А 14 маладым спецыялістам, якія сёлета папоўнілі кадравы склад сферы адукацыі, далі пажаданне – несці свежыя ідэі, але абапірацца на падмурак, закладзены старэйшымі калегамі.
Адбылося і ўзнагароджанне лепшых педагогаў і спецыялістаў сістэмы адукацыі раёна.
Яркія і эмацыянальныя выступленні дашкалят і школьнікаў надалі педфоруму сапраўднае адчуванне свята. А фінальнае дэфіле настаўнікаў і выхавальнікаў, якія прадэманстравалі сучасны дрэс-код, і агульная песня ператварылі залу ў адну вялікую сям’ю.
Жнівеньская педканферэнцыя выканала сваю галоўную функцыю: дала зрэз стану спраў, паставіла мэты і натхніла на плённую работу. Новы навучальны год пачынаецца не з пустога ліста, а з выразнага плана дзеянняў. Наперадзе‑365 дзён адкрыццяў, экзаменаў і перамог. Настрой, падтрымка кіраўніцтва і вера ў свае сілы дазваляюць глядзець у будучыню з упэўненасцю.
Алена КАРПУШЭНКА.
