Стары Новы год, ці Пра тое, як падарыць сабе казку
Калі нечым захоплены, то жыццё ніколі не будзе нудным. У гэтым упэўнена Святлана Архіпава з Шуміліна, якая разам з мамай Таісіяй Фамянок працягвае збіраць бабуліну калекцыю паштовак. Іх ужо больш за 400. Пры тым усе экспанаты з прывітаннямі і віншаваннямі, з кожным звязаны прыемныя ўспаміны ці важная падзеі.
Напярэдадні Новага года Святлана падлічыла, што ў калекцыі больш за сотню навагодніх паштовак. Самая рарытэтная датавана 1952 годам. Гэта стылізаваны фотаздымак, на якім выяўлены дзядуля і матуля з братам. Такую ў той час можна было заказаць у фотаатэлье ў Шуміліне.
Новы год – любімае свята ў гэтай сям’і. Тут абавязкова гатуюць аліўе, п’юць шампанскае і аддаюцца ўспамінам… Таісія Пятроўна – аднагодка Перамогі. Яе дзіцячыя гады выпалі на той час, калі было не да святаў.
– Смачней, чым бульба і сала з марозу, тонка нарэзанае, я нічога не ела, – успамінае Таісія. – На Новы год тата абавязкова прыносіў з лесу ёлку пад столь, а мы з братам упрыгожвалі яе гірляндамі з нарэзаных папяровых палосак і райскімі яблычкамі, якія раслі ў садзе.
У гэты раз Таісія Пятроўна папрасіла дачку згатаваць «моднае»: курыную ножку з грыбамі ў мяшэчку са слоенага цеста. Дарэчы, Святлана заўсёды робіць стаўку на сытныя стравы, бо муж і двое дарослых сыноў заўсёды аддадуць перавагу менавіта такім закускам.
Перабіраючы старыя паштоўкі, жанчыны крыху сумуюць па часах, калі з нецярпеннем чакалі паштальёна з вестачкай ад родных і сяброў, самі пачкамі адпраўлялі віншаванні ў розныя гарады. Раней было прынята слаць паштоўкі да ўсіх святаў. Здавалася б, цяпер у месенджарах можна адправіць, што хочаш, нават відэа. Але хіба гэтыя прывітанні радуюць нас гэтак жа, як старыя добрыя паштоўкі?..
– Цяпер прынята наракаць на адсутнасць навагодняга настрою. Але ж толькі мы самі за яго ў адказе, – упэўнена Святлана Архіпава. – Ніхто не створыць для вас свята. Яно павінна быць у душы.
Святлана ведае, што дарыць значна прыемней, чым атрымліваць. Напрыклад, сёлета яна з задавальненнем паўдзельнічала ў ананімным абмене падарункамі праз Інстаграм «Таемны Санта». Ёй прыемна думаць, што яе падарунак некага пацешыў, хай нават наўзамен яна нічога і не атрымае.
Святлана і Таісія мараць, каб іх калекцыя працягвала папаўняцца новымі асобнікамі.
Наталля ЧАРНІЧЭНКА.
Апублікавана ў №99 ад 21.12.2022 г.