6 шумілінцаў стануць пагранічнікамі
Працягваецца прызыўная кампанія. Прызыўнікі зараз праходзяць медыцынскую камісію, а ў адасобленую групу прыязджаюць прадстаўнікі вайсковых часцей для адбору новага папаўнення.
10 кастрычніка ў раён прыехаў прадстаўнік Полацкага пагранічнага атрада Віталь Таразевіч.– Каб стаць пагранічнікам, прызыўнікам неабходна прайсці сур’ёзны адбор. Маладыя людзі могуць трапіць на службу ў Полацкі ці Мазырскі пагранічныя атрады, Гомельскую пагранічную групу ці ў групу сувязі і забеспячэння, якая знаходзіцца ў Мінску, – падкрэсліў Віталь Таразевіч. – Улічваюцца псіхалагічнае здароўе, фізічная падрыхтаванасць. Важна і жаданне самога прызыўніка стаць пагранічнікам. Спачатку аналізуецца асабістая справа маладога чалавека, затым праводзіцца псіхалагічнае тэсціраванне, потым па тэлефоне вядзецца гутарка з бацькамі, і толькі пасля субяседвання і праверкі асобы кандыдата выносіцца канчатковае заключэнне.
З 9 шумілінскіх кандыдатаў пагранічнікамі стануць 6. Віталь Таразевіч расказаў заўтрашнім пагранічнікам бліжэйшыя перспектывы службы: «Па прыбыцці ў пагранічны атрад на базе вучэбнага пункта на працягу 10 дзён да прыняцця Ваеннай прысягі засвоіце курс пачатковай ваеннай падрыхтоўкі. Месяц пойдзе на вывучэнне асноў пагранічнай службы, затым – стажыроўка ў падраздзяленнях, якія непасрэдна ахоўваюць Дзяржаўную граніцу Рэспублікі Беларусь. І толькі пасля гэтага прыступіце да аховы Дзяржаўнай граніцы ў сваіх падраздзяленнях».
Па інфармацыі начальніка адасобленай групы Шумілінскага раёна ваеннага камісарыята Бешанковіцкага і Шумілінскага раёнаў Наталлі Банцэр, на мінулым тыдні ў Шуміліне працавалі прадстаўнікі Унутраных войск, па выніках адбору два шумілінскія прызыўнікі будуць праходзіць тэрміновую вайсковую службу ва Унутраных войсках.
Аляксандр ШЭДЗЬКО.
