Аб’яднаныя любою да прыроды
Для павышэння экалагічнай свядомасці па ўсім свеце ствараюцца сеткі экалагічных або “Зялёных” школ. Сёння гэтая сетка аб’ядноўвае больш за 40 тысяч школ у 46 краінах свету – ад Вялікабрытаніі з Францыяй да Марока і Паўднёва-Афрыканскай Рэспублікі.
Не засталася ў баку і Беларусь. Праца па стварэнні сеткі «Зялёных школ» вядзецца ў нашай краіне з 2010 года і падтрымліваецца сумесным праектам Еўрапейскага саюза і Праграмы развіцця ААН. Распрацаваны адукацыйны экалагічны праект «Зялёныя школы», які накіраваны на павышэнне экалагічнай культуры як вучняў, так і дарослых.
У праекце «Зялёная школа» бяруць удзел установы агульнай сярэдняй адукацыі, экалагічныя цэнтры для дзяцей і юнацтва Беларусі. На Віцебшчыне працуюць звыш 20 “Зялёных школ”, сёлета яшчэ 25 устаноў, у тым ліку і Шумілінская раённая гімназія, падалі заяўкі на ўдзел у экалагічным праекце.
“Наша гімназія месціцца ў чароўным месцы – лес, возера, – расказвае дырэктар гімназіі Л. У. Маладзечкіна. – Гімназісты займаюць прызавыя месцы на самых прэстыжных конкурсах. А пра багаты раслінны і жывёльны свет, які побач, на жаль, ведаюць мала. Да таго ж упэўнена, што сучасны адукаваны чалавек не можа быць без устойлівага экалагічнага светапогляду. Таксама мяркуем праз гэты праект павялічыць нашы міжнародныя сувязі”.
У рамках праекта ў гімназіі будуць працаваць па пяці асноўных кірунках: вывучэнне відавой разнастайнасці раслін і жывёл і спосабаў яе павелічэння; энерга- і водазберажэнне, праца па памяншэнні адходаў і спосабаў пераапрацоўкі другаснай сыравіны, правядзенне акцый, выстаў, конкурсаў, экалагічная асвета для мясцовага насельніцтва.
Для атрымання дыплома “Зялёная школа” ўстанове адукацыі неабходна выканаць па выбары шэраг заданняў, прадставіць справаздачу ў Каардынацыйны савет праекта. Установа адукацыі, якая выканала заданні, атрымлівае статус ”Зялёная школа” з выдачай адпаведнага дыплома першай, другой або трэцяй ступені.
“Нягледзячы на тое, што мы ўключыліся ў праект “Зялёная школа” толькі з пачатку гэтага года, намі ўжо выканана больш чым 30% заданняў, – расказвае настаўніца гімназіі І. У. Кулікава, якая курыруе праект. – Разлічваем атрымаць дыплом першай ступені”.
У гімназіі пачаў працаваць клуб “Крылаты дазор”. Гімназісты прынялі ўдзел у восеньскіх днях назірання за птушкамі, атрымалі сертыфікат “Выратавальнік арляняці”, вывучылі разнастайнасць дрэў, якія растуць непадалёк ад гімназіі, пасадзілі кедры з Сібіры каля царквы і ў Лескавічах, бралі ўдзел у міжнародных экаўроках “Захавальнікі вады”. Ірына Уладзіміраўна падкрэсліла, што ў гімназіі будуць рабіць усё магчымае, каб установа стала адным з цэнтраў экалагічнай адукацыі ў раёне.
Як адзначыла І. У. Кулікава, асаблівая ўвага надаецца заказніку “Казьянскі”. Была арганізавана экскурсія калектыву гімназіі, экскурсанты-эколагі на чале з вядучым спецыялістам заказніка “Казьянскі” Святланай Ільінец пазнаёміліся з прыроднымі, археалагічнымі і гістарычнымі помнікамі. Асаблівае ўражанне пакінула наведванне шматвяковай дубовай алеі. Восенню пабывалі ў заказніку і гімназісты. Дарэчы, транспарт на гэтыя экскурсіі прадаставіла ДРБУ-204. У планах – прадоўжыць даследаванні вучняў Суравенскай школы па вывучэнні і вырашэнні праблем заказніка, наладзіць цеснае супрацоўніцтва з вядомым арнітолагам У. В. Іваноўскім.
У гімназістаў багата цікавых экалагічных ідэй і прапаноў. Тут упэўнены, што, пачынаючы з сябе, можна вырашаць самыя смелыя экала-гічныя праблемы.
Алесь САКАЛОЎ.
Надрукавана ў №93 ад 27.11.2015 г.