Куды звяртацца, калі вы сталі ахвярай насілля?
Куды звяртацца, калі вы сталі ахвярай насілля? На гэта пытанне адказвае ўчастковы інспектар РАУС Юрый Сільвестраў:
– Дамашняе насілле адбываецца за закрытымі дзвярыма, але, несумненна, з’яўляецца праблемай усяго грамадства. Дамашняе насілле бывае – фізічнае, сексуальнае, эканамічнае. Сюды адносяцца знявагі, запужванні, пагрозы, прымусовыя сексуальныя адносіны, эканамічная залежнасць.
Калі вы самі сталі ахвярай дамашняга насілля і плануеце збегчы ад агрэсара, трэба звярнуцца ў РАУС або да свайго ўчастковага інспектара, які дапаможа разабрацца з праблемай. Можна звяр-тацца і ў крызісны пакой, які існуе пры тэрытарыяльным цэнтры сацыяльнага абслугоўвання насельніцтва. Паслугі часовага прытулку прадастаўляюцца грамадзянам старэй за 18 гадоў і сем’ям з дзецьмі, якія пацярпелі ад дамашняга насілля.
Ва ўсялякім разе замоўчваць пра насілле і цярпець не варта. Нагадваем, што за правапарушэнні, якія здзяйсняюцца ў сферы сямейна-бытавых адносін, будзе складзены адміністрацыйны пратакол. Згодна з арт. 10.1 КаАП пагражае штраф да 10 БВ або арышт, або грамадскія работы. Калі пацярпеламу нанесены цялесныя пашкоджанні, то штраф – ад 10 да 30 БВ. За наўмыснае прычынен-не лёгкіх цялесных пашкоджанняў можа быць узбуджана крымінальная справа (арт.153 Крымінальнага кодэкса Рэспублікі Беларусь), максімальнае пакаран-не – папраўчыя работы да аднаго года або арышт на той жа тэрмін.
Ларыса КІСЯЛЁВА.
