60 маладых спецыялістаў прыйшлі сёлета працаваць у арганізацыі і на прадпрыемствы Шумілінскага раёна.
16 з іх закончылі вышэйшыя навучальныя ўстановы, 33 – сярэднія спецыяльныя, 11 – прафесійна-тэхнічныя. Самае шматлікае папаўненне прыйшло ў сельскую гаспадарку – 17 чалавек, у адукацыю – 12, па 9 спецыялістаў папоўнілі сферы будаўніцтва і аховы здароўя, 3 – РЦГЭ, 2 – райаддзел па надзвычайных сітуацыях.
Калектыў раённага цэнтра гігіены і эпідэміялогіі сёлета папоўнілі тры маладыя спецыялісты – Ганна ЦУПКО, Софія КАРЭЛІНА і Крысціна ПІМЕНАВА. Крысціна працуе на пасадзе памочніка ўрача—підэміёлага, Софія і Ганна – памочнікі ўрача-гігіеніста.
Дзяўчаты закончылі Віцебскі медыцынскі каледж і па размеркаванні трапілі ў Шуміліна. Софія родам з Бешанковіцкага раёна, Крысціна і Ганна – з Віцебскага. Вучыліся дзяўчаты ў адной групе, зараз разам працуюць. Софія і Ганна атрымалі пакой у адным з інтэрнатаў райцэнтра і паціху прызвычайваюцца да шумілінскага жыцця, а Крысціна на работу ездзіць з Віцебска.
Першыя тыдні работы для дзяўчат праляцелі незаўважна. Ім падабаецца іх першы працоўны калектыў, дзе кожны імкнецца дапамагчы маладым спецыялістам.
Алесь САКАЛОЎ.
