Вярнуліся дадому!
18 красавіка на радзіму вярнуліся 12 шумілінцаў, якія 35 дзён знаходзіліся на ваенных зборах у Заслонаве.
Павіншаваў салдат начальнік адасобленай групы Шумілінскага раёна аб’яднанага ваеннага камісарыята Бешанковіцкага і Шумілінскага раёнаў Андрэй Собін. Галоўны спецыяліст аддзела ідэалагічнай работы і па справах моладзі райвыканкама Вольга Шаўнёва ўручыла землякам Падзячныя лісты старшыні райвыканкама Сяргея Галынчыка і старшыні раённага Савета дэпутатаў Мікалая Будневіча за ўдзел у мерапрыемствах па праверцы ўзроўню баявой гатоўнасці злучэнняў і воінскіх часцей Узброеных Сіл Рэспублікі Беларусь.
МУЖЧЫНЫ ПАДЗЯЛІЛІСЯ ЎРАЖАННЯМІ АД ВАЕННЫХ ЗБОРАЎ
Яўген Бяляцкі:
– На зборах быў стралком-радыстам. Служба праходзіла нармальна, набыў новых сяброў. Заўтра сяду за руль МТЗ – працую механізатарам СУП «Лаўжанскае».
Марат Арцёменка:
– Сярод шумілінцаў я быў самы малады, мне 21 год. Летась у канцы кастрычніка вярнуўся з тэрміновай ваеннай службы. Таму на зборах было лёгка – не забыўся пра салдацкую службу. На зборах быў старшым электрыкам – мая прафесія запатрабавана там, дзе многа тэхнікі.
Аляксандр Філіпенка:
– Зборы прайшлі ў рытме салдацкай службы. Я быў прызначаны старшым механікам рамонтна-эвакуацыйнай роты, адказваў за спраўнасць тэхнікі. Цяпер вяртаюся да сваёй прывычнай работы – на Обальскі керамічны завод, дзе працую на «Амкадоры».
Яўген Гоманаў:
– Мяне чакаюць у забойным цэху «Вітконпрадукта», дзе працую кладаўшчыком. На зборах быў слесарам-зваршчыкам, рамантаваў бронетанкавую тэхніку. Служба была па сілах.
Аляксандр Плакуноў:
– Як і на тэрміновай ваеннай службе, быў вадзіцелем «Урала»: падвозіў генератары і паліва для ваенных машын. Зараз еду да бацькоў у Мікіціху – яны з нецярпеннем чакаюць.
Ларыса ЗАЙЦАВА.
