“Умацоўваем берагі”
Ля вёскі Чэрчыцы працуе тэхніка. Экскаватары, пагрузчыкі, МАЗы належаць прадпрыемству “ДнепраБугвадшлях” г. Пінска. Ужо каторы тыдзень брыгада гэтай арганізацыі рупіцца на беразе Заходняй Дзвіны.
“Умацоўваем берагі, – тлумачыць майстар вытворча-тэхнічнага аддзела Генадзь Неўдах. – Гэта вельмі важна, бо калі будзе пабудавана Полацкая ГЭС, узровень вады ў рэчцы падымецца дзесьці метраў на пяць. Вельмі трывожна, што размые берагі і вада затопіць вёску. Каб гэтага не здарылася, мы спачатку здымаем чарназём на берагах, потым укладваем адхоны спецыяльнымі плітамі. А ўжо ў пачатку чэрвеня будзем зверху зноў засыпаць чарназёмам і засяваць траву. Так берагі будуць надзейныя, іх не размые”.
Пінскія работнікі прыехалі працаваць на Шуміліншчыну ў верасні мінулага года – умацавалі паўтара кіламетра берагоў Дзвіны ў вёсках Рыпіншчына і Надзежына. А ў Чэрчыцах мяркуюць правесці гэтыя работы на працягу двух кіламетраў. “Будзем працаваць да разводдзя, а потым зробім перапынак, – кажа Генадзь Неўдах. – Пасля Чэрчыц мяркуем працаваць у вёсках Убоіна і Шашы. А ўвогуле ў гэтым годзе плануем поўнасцю завяршыць умацаванне берагоў Дзвіны ў вашым раёне”.
Ларыса ЗАЙЦАВА.
Надрукавана ў №28 ад 09.04.2013 г.