ПМС падстаўляе плячо
Усяго пад яравую сяўбу па раёне трэба вывезці 310 тысяч тон арганічных угнаенняў, расказала галоўны аграхімік раёна Алеся Казлова. Гэтай работай пачалі займацца параўнальна нядаўна: на 18 кастрычніка было вывезена ўсяго дзесяць тысяч тон арганікі.
У перадавіках па вывазцы арганікі — КУСГП “Сіроцінскі”, УП “Шумілінскі райаграсэрвіс”, ААТ “Прыазёрны мір”.
На мінулым тыдні мы пабывалі на палетках КУСГП “Сіроцінскі”. Непадалёк ад вёскі Філіпенкі кіпела работа, працавалі з ПМС. “Нашы механізатары працуюць у “Сіроцінскім” з сярэдзіны верасня, – кажа дырэктар прадпрыемства меліярацыйных сістэм А. В. Аляксеенка. – Вывезлі на палі амаль дзве тысячы тон арганічных угнаенняў. Хлопцы тут надзейныя, ніякіх праблем”.
Горы гною, што ляжалі на полі ля Філіпенак, паступова “растаялі”. “Засталося вывезці дзесьці дзве з паловай тысячы тон, – кажа галоўны аграном гаспадаркі У. А. Федаськоў. – Уласных трактароў, ды і людзей таксама, у прыпар у гаспадарцы не хапае. Вельмі добра дапамагаюць меліяратары. Калі фінішуе ўборка кукурузы, тады і свае МТЗ накіруем на ўборку кукурузы”.
А пакуль дапамагаюць работнікі прадпрыемства меліярацыйных сістэм. Экскаватар і МТЗ ад меліяратараў на адвозцы працуюць кожны дзень.Механізатар П. М. Усцінаў паспявае рабіць за дзень па 12-14 рэйсаў. Адвозіць да ста тон у дзень.
А на экскаватары працуе І. І. Сянькоў (на здымку). Іосіф Іванавіч (для яго, дарэчы, сёлетні год юбілейны – сорак гадоў работы ў ПМС) расказаў, што і ў мінулыя гады дапамагалі гаспадарцы з вывазам арганікі. Напрыклад, год назад вызвалілі ад гною ферму Слабада. “Не ўпершыню ж, – смяецца механізатар. – Галоўнае, што гаспадарка своечасова дае паліва. Прастояў у рабоце няма. Да таго ж, мы і самі зацікаўлены добра працаваць, каб мець нядрэнны заробак”.
Ларыса КІСЯЛЁВА.
Надрукавана ў №83 ад 22.10.2013 г.