Сотрудники Шумилинском музея рассказывают детям о весенних традициях белорусов

Перадаць традыцыі дзецям
У сакавіку ў Шумілінскім гісторыка-краязнаўчым музеі на музейных занятках “Вясна прыходзіць з ласкаю і са сваёю казкаю” дзеці знаёміліся з веснавымі звычаямі нашых продкаў.
Даўней людзі не  проста чакалі вясну, а прыдумалі вясёлыя і святочныя абрады для яе сустрэчы. Напрыклад, існаваў абрад сустрэчы птушак. У дзень вясновага раўнадзенства, 22 сакавіка, жыхары  навакольных вёсак ляпілі з цеста птушак-жаваранкаў,  выпякалі іх у печы і раздавалі дзеткам, а тыя радасныя залазілі з гэтымі фігуркамі на дахі хат, на пагоркі і, падкідваючы іх у паветра, заклікалі вясну.
Гэты і іншыя вясновыя народныя абрады ляглі ў аснову музейнага занятку. Дзеці з задавальненнем ляпілі з цеста першых вестуноў вясны – жаваранкаў, выраблялі  вясновых птушачак з паперы і развешвалі на дрэвах у парку, каб вясна прынесла дастатак у кожную хату. Як і ў даўнія часы, «варылі» «грачыную» кашу і адносілі  яе «гарачую» ў збанках на рыдлёўцы ў поле і «кармілі» аслабелых пасля доўгай зімы птушак, каб яны разам з людзьмі змаглі ў вясну ўвайсці, дапамагалі абзавесціся вясновым жытлом птушкам, якія прыляцелі з далёкіх краёў.
Знаёмства дзяцей з  даўнімі нацыянальнымі традыцыямі сустрэчы вясны, салодкія пачастункі і добры настрой  сталі асноўнымі вынікамі музейнага занятку.
С. ІВАНОВА, дырэктар Шумілінскага гісторыка-краязнаўчага музея.
Надрукавана ў №24 ад 27.03.2015 г.