Свиней держать можно, но очень сложно

Як трымаць свіней па правілах
Нядаўна работнікі райветстанцыі ва ўсіх сельвыканкамах правялі вучобу па правілах утрымання на прыватных падворках свіней. На вучобу былі запрошаны старэйшыны вёсак і мясцовыя дэпутаты, якім раздалі памяткі з ветсанправіламі – пра іх яны павінны расказаць сваім землякам.
Напэўна, усе вяскоўцы  ведаюць, што ў раёне дазволена трымаць свіней любых парод (выключэнне складаюць толькі парсюкі-вытворнікі і свінаматкі).  Але дзеля прафілактыкі перасцярога не перашкодзіць: перад пастаноўкай жывёлы і пасля забою ў хлеўчуках рэкамендуецца зрабіць дэзінфекцыю. Пажадана круглы год змагацца з грызунамі (з дапамогай пастак ці атруты), якія з’яўляюцца пераносчыкамі многіх інфекцый.
“На вуліцы свіней трымаць забаронена, – кажа намеснік начальніка райветстанцыі А. П. Бяляеў. – Больш таго, кожная гаспадарчая пабудова павінна быць агароджана, а гаспадар павінен мець зменнае адзенне і абутак, у якіх будзе хадзіць толькі ў хляўчук. Побач не перашкодзіць зрабіць рукамыйнік: вымыў рукі – і пайшоў карміць жывёлу. Ля ўваходу ў хлеў рэкамендуецца пакласці дэзінфекцыйны дыванок. Яго няцяжка зрабіць сваімі рукамі:  дастаткова збіць невялікі драўляны кораб, пакласці ўнутр мешкавіну, напоўненую апілкамі, а зверху рэгулярна паліваць любым дэзінфекцыйным сродкам”.
Работнікі райветстанцыі папярэджваюць вясковых гаспадароў, каб тыя не куплялі несертыфікаваны камбікорм. Ён  можа быць няякасным і выклікаць розныя хваробы. Самы надзейны – гэта грануляваны камбікорм, які пры вырабе падвяргаецца тэрмічнай апрацоўцы, упэўнены начальнік райветстанцыі І. У. Галуза.  Астатнія кармы, у тым ліку і муку, пажадана запарваць, а не даваць сырымі.
І апошняе. Пасля наведвання лясоў  работнікі райветстанцыі рэкамендуюць жыхарам раёна вымыцца і пераапрануцца. Гэта прафілактычная мера, каб не занесці якую-небудзь інфекцыю да дамашняй жывёлы.
Ларыса КІСЯЛЁВА.
Надрукавана ў №29 ад 14.04.2015 г.