Жніво назаве лепшых
На прэзідыуме раённага камітэта прафсаюза работнікаў аграпрамысловага комплексу, які прайшоў на мінулым тыдні, былі разгледжаны задачы прафсаюзных арганізацый па ўдзеле ў падрыхтоўцы і правядзенні ўборкі ўраджаю 2017 года.
Сумесна з работнікамі ўпраўлення сельскай гаспадаркі і харчавання райвыканкама быў абмеркаваны комплекс пытанняў, звязаных са жнівом. Распрацаваны ўмовы спаборніцтваў, вызначаны памеры ўзнагароджання лідараў жніва. Зернеўборачны экіпаж, які першы намалоціць тысячу тон, атрымае прэмію ў памеры 50 рублёў (30 рублёў – старшы камбайнер і 20 рублёў – камбайнер). Вадзіцель, які першым перавязе тысячу тон збожжа, атрымае прэмію ў памеры 30 рублёў.
В. а. старшыні райкама прафсаюзаў работнікаў АПК Людміла Варкун нагадала лідарам сельгаспрадпрыемстваў пра тое, што трэба і на месцах правесці пашыраныя пасяджэнні прафсаюзных камітэтаў і распрацаваць умовы матэрыяльнага і маральнага заахвочвання работнікаў, занятых ва ўборачнай кампаніі, давесці да іх задачы працоўнага спаборніцтва, расказаць пра ўмовы аплаты працы. Асаблівую ўвагу было рэкамендавана звярнуць на выкананне патрабаванняў Дырэктывы № 1, на працоўную дысцыпліну.
У час жніва старшыні прафсаюзных камітэтаў будуць ажыццяўляць строгі кантроль за своечасовым правядзеннем інструктажоў па тэхніцы бяспекі, за забеспячэннем удзельнікаў жніва сродкамі індывідуальнай аховы, медыцынскімі аптэчкамі, гарачым харчаваннем, за стварэннем санітарна-бытавых умоў працы.
Ларыса ЗАЙЦАВА.
Надрукавана ў №60 ад 04.08.2017 г.
