Накірунак на запатрабаваныя паслугіКамунальнае ўнітарнае прадпрыемства бытавога абслугоўвання насельніцтва імкнецца забяспечваць жыхароў раёна запатрабаванымі паслугамі, хаця прадпрыемству не проста выжываць у складаных умовах. Акрамя 11 відаў сацыяльна-значных паслуг (рамонт і пашыў адзення, хімчыстка, пракат, паслугі цырульніка, рамонт абутку і тэлерадыёапаратуры і іншае), з’явіліся і новыя, якія сёння карыстаюцца попытам у насельніцтва.
У канцы мінулага года райбыткамбінат набыў за бюджэтныя грошы “Газель”. Гэта стала дадатковым штуршком для аказання разнастайных бытавых паслуг насельніцтву па ўсім раёне. І калі летась прадпрыемства не дацягвала да плана, то за студзень-люты гэтага года выканана паслуг насельніцтву на 117,7%, а на вёсцы гэта лічба яшчэ больш важкая – 131,7%.
– Каб выжыць у няпростых эканамічных умовах, аналізуем і падлічваем, якія паслугі будуць выгаднымі, – кажа дырэктар райбыткамбіната Віктар Бабічаў. – Вось нядаўна заняліся продажам дроў насельніцтву. Купляем вялікую дзялянку, наразаем цуркі, загружаем прычэп (больш за 6 кубічных метраў) – і прадаем. Людзі падлічылі, што ў нас купіць выгадней, чым у прыватнікаў. Дровы ідуць нарасхват. Таму, каб працаваць было хутчэй, думаем набыць у лізінг трактар з аўтапагрузчыкам. Дзелавую драўніну выкарыстоўваем па назначэнні – заключылі дагавор з Обальскім керамічным заводам на выраб паддонаў. Пакуль за месяц іх плануем рабіць па тысячы штук, а ў далейшым – павялічваць вытворчасць. Мяркуем паставіць вытворчасць паддонаў на паток: гэта і нам выгадна і ОКЗ, бо зменшацца транспартныя выдаткі. Летам нават мяркуем узяць сабе памочнікаў – маладзёжны атрад райкама БРСМ.
Увогуле трымаем накірунак на дрэваапрацоўку, будзем адкрываць пяць рабочых месцаў. Плануем прадаваць дровы на экспарт, вырабляць, як і раней, дошкі, рэйкі, плінтусы, штыкетнік для насельніцтва.
Бетонная агароджа зараз не карыстаецца попытам, таму цэх часова закрыты. Але ж мы прадумалі новы від прадукцыі – будзем вырабляць тратуарную плітку. Думаю, яна вельмі спатрэбіцца пры навядзенні парадку ў райцэнтры да “Дажынак”, якія будуць ладзіцца ў Шуміліне ў 2021 годзе”.
Акрамя названых работ, работнікі райбыткамбіната займаюцца разборам старых пабудоў, добраўпарадкаваннем могілак. А ў бліжэйшы час мяркуюць аказваць паслугі па чыстцы дываноў і мэблі.
Ларыса КІСЯЛЁВА.
Надрукавана ў №23 ад 22.03.2019 г.
