Ансамбль «Экспрессия» Шумилинской ДШИ стал призёром международного чемпионата

Культура Моладзь Навіны

Шумілінская  “Экспрэсія” ў  Санкт-Пецярбурзе
Ансамбль мажарэтак і барабаншчыц “Экспрэсія” Шумілінскай дзіцячай школы мастацтваў стаў прызёрам міжнароднага чэмпіянату “Гран-пры” па мажарэт-спорце і цвірлінгу, які адбыўся 28-30 верасня ў Санкт-Пецярбурзе.

Запрашэнне на ўдзел у гэтым прэстыжным конкурсе шумілінская “Экспрэсія” атрымала яшчэ ў ліпені пасля “Славянскага базару”, расказала кіраўнік калектыву Кацярына Кузьміна. Менавіта там іх убачылі і вылучылі арганізатары конкурсу на чале з Сусветнай федэрацыяй па мажарэт-спорце (WMF).
Калектывы 12 краін свету (Беларусь, Расія, Балгарыя, Грэцыя, Венгрыя, Польшча, Казахстан і інш.) прынялі ўдзел у конкурсе. Ад Віцебскай вобласці разам з шумілінскай “Экспрэсіяй” у Санкт-Пецярбург паехалі ансамблі мажарэтак і барабаншчыц з Дуброўна, Новалукомля і Оршы.
Прыгожа, упэўнена, віртуозна выступілі шумілінскія барабаншчыцы. Іх майстэрства атрымала высокія адзнакі суддзяў розных краін. У намінацыі “Барабаншчыцы” ансамбль “Экспрэсія” пад кіраўніцтвам Кацярыны Кузьміной заняў 3 месца ва ўзроставай катэгорыі юніёркі (12-14 год) і 4-е ў катэгорыі сіньёркі (ад 15 год і старэй).
Радасць перамогі дапоўнілі яркія ўражанні ад знаёмства з Санкт-Пецярбургам. Кацярына Сяргееўна не дала сваім выхаванцам заседжвацца ў гасцініцы “Чаплін-Хола” з яго аксамітавай аздобай і абмяжоўвацца відам на крэйсер “Аўрора”, пацягнула дзяўчат у вячэрні горад, паехалі на метро на Сенацкую плошчу з яе Медным коннікам, Ісакіеўскім саборам, з цудоўным відам на Няву… А потым яшчэ рашыліся на водную прагулку на цеплаходзе. І старадаўні горад, падсвечаны сучаснымі агнямі, і развадныя масты, і ўся атмасфера так уразіла дзяўчат, што многія не маглі стрымаць слёз. “Страшна прыгожа!”, – патлумачылі барабаншчыцы прычыну сваіх слёз Кацярыне Сяргееўне.
Аліна ПЯТРОВА.
Надрукавана ў №79 ад 08.10.2019 г.