Інтарэс да будаўнічых бытовак
Пры арганізацыі тэрыторыі пад будаўніцтва аб’ектаў неабходна ўладкоўваць месцы для часовага знаходжання работнікаў, якія абавязкова павінны быць абаронены ад атмасферных ападкаў, абагравацца ў халодны перыяд. У народзе іх звычайна называюць будаўнічымі бытоўкамі, незалежна ад канструкцыі і размяшчэння на будаўнічай пляцоўцы. І галоўная ўмова – такія часовыя аб’екты павінны ў першую чаргу быць пажаранебяспечнымі. І за гэтым пільна сочаць супрацоўнікі інспекцыі дзяржпажнагляду.
У вагоне-бытоўцы:
– нельга выкарыстоўваць самаробныя ці неабароненыя абагравальнікі;
– абыходзіцца з электрапрыборамі трэба акуратна, без нагляду іх пакідаць нельга,
– трэба выконваць правілы карыстання пячным і газавым абсталяваннем,
– курыць у бытоўцы катэгарычна забараняецца,
– вогнетушыцель павінен размяшчацца ў лёгка даступным месцы.
Так, нядаўна ў такі рэйд на дзеючыя будаўнічыя пляцоўкі райцэнтра разам са старшым інспектарам інспекцыі райаддзела па надзвычайных сітуацыях Дзмітрыем Гушчыным адправіўся карэспандэнт раённай газеты. “На сённяшні дзень у Шуміліне чатыры асноўныя пляцоўкі: на аб’ектах па вуліцах Ленінскай, Шумілінскай і Юбілейнай і на завулку Угнявёнка, – паведаміў выратавальнік. – Давайце паглядзім, наколькі яны адпавядаюць нормам пажарнай бяспекі”.
Сапраўды, на ўсіх будоўлях уладкаваны бытавыя памяшканні, на некаторых – нават некалькі адначасова. Асноўная прэтэнзія выратавальнікаў да будаўнікоў – выкарыстоўванне награвальных прыбораў незаводскай вытворчасці, так званых “самапальных” абагравальнікаў. Ёсць выпадкі, калі печка змайстравана наогул саматужным спосабам – на цаглінах. Толькі на адным аб’екце печка адпавядала нормам – там быў уладкаваны электрычны ацяпляльны прыбор.
Другі недахоп – адсутнасць пярвічных сродкаў пажаратушэння. На ўсіх наведаных будаўнічых пляцоўках адсутнічалі спецыяльныя месцы для курэння. І гэта не прыдзіркі, бо, як адзначыў Дзмітрый Гушчын, у сукупнасці ўсе пералічаныя парушэнні часта і прыводзяць да загаранняў і гібелі людзей. Асабліва актуальная праблема ў зімова-вясенне-асенні перыяд, калі абагравальнікі ў бытоўках не выключаюцца ні на хвіліну, а самі будаўнікі забягаюць пагрэцца рэгулярна.
Па выніках рэйду гаспадарам усіх будаўнічых пляцовак выдадзены прадпісанні па ўхіленні парушэнняў, вызначаны тэрміны паўторнага маніторынгу.
Алена КАРПУШЭНКА.
