150 тон пяску з гарадскіх вуліц
«Вясна для нас вельмі напружаны час, – пачынае размову майстар па добраўпарадкаванні УП ЖКГ Вераніка Багданава. – Неабходна як мага хутчэй на шумілінскіх вуліцах навесці парадак пасля зімы. Хочацца сустрэць вясну ў прыгожым, а галоўнае чыстым гарадку». Майстар падкрэсліла, што ніякага аўралу няма, а работнікі дзень за днём прыводзяць у парадак райцэнтр.
Два тыдні спатрэбіліся камунальнай службе, каб убраць з дарог і тратуараў Шуміліна смецце і пясок, што засталіся пасля зімы. Як адзначыла майстар, з 18 кіламетраў гарадскіх вуліц было вывезена каля 150 тон пяску. Пасля ручной ачысткі вуліц на дарогі «пайшоў» трактар-пыласос, які два-тры разы на тыдзень будзе чысціць шумілінскія дарогі.
У райцэнтры больш чым 1600 дрэў і слупоў, якія неабходна было пабяліць. За мінулы тыдзень справіліся і з гэтай задачай. На ўсе работы пайшло каля 600 кг вапны.
Зараз работнікі УП ЖКГ займаюцца афарбоўкай бар-дзюраў. Для гэтых мэт прадпрыемства набудзе каля 1 т белай і 600 кг чорнай фарбаў. Плануецца, што бардзюры стануць чорна-белымі да канца красавіка.
Аляксандр ШЭДЗЬКО.
Надрукавана ў №29 ад 14.04.2020 г.
