Лета – самы час для любімых спартыўных гульняў. У гэтым перакананы дзеці, якія адпачываюць і трэніруюцца ў спартыўным лагеры «Старт», які адкрыла Шумілінская СДЮШАР на базе Обальскай школы.
«Першая змена спартыўнага лагера аб’яднала 20 дзяцей ад 10 да 14 год, – расказвае загадчык лагера Антаніна Пальвінская. – Гэта нашы выхаванцы, якія ў вучэбны час займаюцца ў обальскіх аддзяленнях СДЮШАР валейболам і грэка-рымскай барацьбой».
Выхавальнікамі на час лагера працуюць трэнеры спартыўнай школы Людміла Харкавец і Пётр Ганушчанка. Даспадобы дзецям адпачынак і трэніроўкі, інтэлектуальныя і творчыя мерапрыемствы.
– Мы летась былі ў спартыўным лагеры. Таму, як даведаліся, што будзе лагер і сёлета, то адразу пайшлі запісвацца. Тут сумаваць няма часу, – наперабой кажуць Валянцін Кірык і Яўген Ліпчанка. – Усё падабаецца. Усё цікава.
Аляксандр ШЭДЗЬКО.
