Прэзідэнт Лукашэнка – аб новай Канстытуцыі
У новай Канстытуцыі Беларусі неабходна пераразмеркаваць паўнамоцтвы паміж органамі ўлады, але пакінуць моцную ролю Прэзідэнта. Такое меркаванне кіраўнік дзяржавы Аляксандр Лукашэнка выказаў у інтэрв’ю расійскім СМІ.
«Некаторыя прадстаўнікі асобных палітычных партый у асноўным сыходзяцца на тым, што трэба пераразмеркаваць паўнамоцтвы паміж органамі ўлады. Трэба. Але пры гэтым трэба памятаць: і Расія, і Беларусь (прыклад таго Украіна) – гэта славянскія дзяржавы, дзе патрэбны моцны лідар, які будзе мець пэўныя паўнамоцтвы. У гэтым яго сіла. Але, напэўна, не такія паўнамоцтвы, якія мае беларускі Прэзідэнт», – сказаў Аляксандр Лукашэнка.
Ён адзначыў, што многія прэзідэнцкія паўнамоцтвы каласальныя па аб’ёме. На думку кіраўніка дзяржавы, іх трэба перадаваць губернатару і парламенту. «Але ўмова адна: атрымаўшы паўнамоцтвы, адказвай. Таму Прэзідэнт павінен захаваць гэты кантроль за сітуацыяй у краіне, за галінамі ўлады. У нас жа Прэзідэнт не ўзначальвае ні адну з галін улады. Ён ажыццяўляе кантроль i накіроўвае дзейнасць галін улады. Ён павінен гэта захаваць. Гэта яго асноўныя паўнамоцтвы. І абарона, і бяспека. Можа, яшчэ нейкія паўнамоцтвы з-за кадравых пытанняў і гэтак далей», – дадаў Прэзідэнт.
Што датычыцца структуры беларускага парламента, Аляксандр Лукашэнка лічыць: перш чым уводзіць партыйную або партыйна-мажарытарную сістэму, трэба стварыць сапраўдныя партыі. «Яны не створаны. Мы не займаліся партыйным будаўніцтвам, таму што ў людзей не было запатрабавання на партыі. І цяпер таксама. Хтосьці бурліць: давайце партыі і іншае. Даю гарантыі: калі б мы ішлі на выбары і вылучылі людзей ад партыі і па мажарытарных спісах, людзі, не ведаючы б партыйных прадстаўнікоў, выбралі б мажарытарыяў, паколькі разумеюць, што яны ад народа, – упэўнены кіраўнік дзяржавы. – Напэўна, настаў час мне сур’ёзна гэтым заняцца. Вядома, да таго, як мы прымем новую Канстытуцыю, трэба яшчэ раз прайсціся па законе аб партыях. І хаця б вызначыцца: калі партыя, то якая колькасць павінна быць. А так у нас усе заявілі аб партыях, і яны фактычна зарэгістраваны, а партыйных білетаў практычна ні ў адной партыі няма. А калі ёсць, то колькасць недабірае. Трэба гэта ўсё ўпарадкаваць, а потым пераходзіць да выбараў».
Пры гэтым Аляксандр Лукашэнка схіляецца да правядзення новых прэзідэнцкіх выбараў пасля прыняцця новай Канстытуцыі. «Я гэта не выключаю. Па тэрмінах я не кажу. Трэба прыняць Канстытуцыю, правесці выбары мясцовых органаў улады. Калі датэрмінова праводзіць прэзідэнцкія выбары, то яны павінны прайсці, напэўна, раней, чым парламенцкія. Усё ж такі парламент трэба захаваць да таго, як з’явіцца новы Прэзідэнт. А потым правесці па новай Канстытуцыі парламенцкія выбары», – расказаў аб сваім бачанні рэформ кіраўнік дзяржавы.
БЕЛТА.
