А вы спрабавалі «паўлаўскі рэцэпт»?
Новы ўчастак сыравэнджанай прадукцыі «Вітконпрадукта» асвойвае выпуск новых гатункаў каўбас
Практычна ўсё лета на тэрыторыі забойнага цэха ТАА «Вітконпрадукт» вялася рэканструкцыя. І да канца жніўня быў зроблены ўчастак сыравэнджанай прадукцыі, а ў верасні ўжо першая партыя новай каўбасы некалькіх гатункаў пасту-піла ў продаж, расказаў начальнік цэха Мікалай Шустроў.
З адкрыццём новага ўчастка ў цэху дадаткова стварылі 12 рабочых месцаў, гатовы і яшчэ ўкладчыкамі-ўпакоўшчыкамі прыняць пяць-шэсць чалавек. Разам з майстрам участка Дзмітрыем Казлоўскім падымаемся на другі паверх, дзе знаходзіцца новае чэшскае абсталяванне.
«У нас чатыры кліматычныя камеры: для выспявання, дзве для сушкі і ўніверсальная, – кажа Дзмітрый Віктаравіч. – Прадугледжана магчымасць дыстанцыйнага кіравання, што вельмі зручна. Ля кліматычных камер працую я адзін, сюды з каўбаснага цэха паступае сырая прадукцыя. Мне застаецца сачыць за яе выспяваннем, за тэмпературай, вільготнасцю і іншымі параметрамі ў камерах. Нядаўна, напрыклад, у камеры паступіла чатыры тоны каўбас. А на выхадзе пасля сушкі іх вага будзе складаць 2,7 тоны. Каўбасы ў залежнасці ад іх гатунку выспяваюць ад 14 да 21 дня. Гэта значыць, што толькі праз два-тры тыдні яны змогуць паступіць у продаж».
У верасні-першай палове кастрычніка на ўчастку сыравэнджаных вырабаў выпусцілі пяць відаў каўбас: «аўстрыйскую», «чэшскую», «іспанскую», «дзмітраўскую» і «паўлаўскі рэцэпт». Тэхнолагі распрацавалі і яшчэ адзін гатунак – сыравяленую каўбасу «італьянская», неўзабаве і яна з’явіцца ў продажы ў магазінах «Мясная лаўка», у гандлёвых сетках Мінскай, Віцебскай, Магілёўскай абласцей.
– Мы толькі набіраем абароты, – расказаў вядучы тэхнолаг прадпрыемства Дзмітрый Сафончык. – За верасень выпусцілі каля 10 тон прадукцыі. Гэта была пробная партыя. Мяркуючы па продажах, шумілінцы палюбілі нашы каўбасы. Асаблівай папулярнасцю карыстаюцца гатункі «паўлаўскі рэцэпт» і «дзмітраўская».
Ларыса ЗАЙЦАВА.
Апублікавана ў №88 ад 12.11.2021 г.
