Пабагацелі на трактары, сеялкі і пагрузчыкі
Сёлета з раённага бюджэту сельгаспрадпрыемствам раёна на набыццё тэхнікі выдзелена больш як паўтара мільёна рублёў, расказаў першы намеснік начальніка ўпраўлення па сельскай гаспадарцы і харчаванні райвыканкама Раман Прасветаў.
Па колькасці набытай сельгастэхнікі і прычапных агрэгатаў да яе на першым месцы – КУСГП «Сіроцінскі». Прадпрыемства закупіла трактар МТЗ-82, прычэп, граблі, раскідвальнік мінеральных угнаенняў, франтальны пагрузчык, два каўшы, захват для рулонаў. За ўсю тэхніку заплацілі 179 тысяч, бюджэтных грошай хапіла, расказалі ў бухгалтэрыі сельгаспрадпрыемства. А вось «Прыазёрны мір» у выдзеленую суму не ўклаўся, прыйшлося даплаціць сваю тысячу рублёў. Затое купілі граблі, раскідвальнікі мінеральных угнаенняў і кормараздатчык на агульную суму 150 тысяч рублёў.
«Мы за выдзеленыя раёнам грошы набылі пасяўны шасцімятровы агрэгат, які каштуе 252 тысячы рублёў і які нам патрэбны, як паветра, – расказала дырэктар КУСГП «Ульскі» Валянціна Лабейка. – Хацелі купіць яшчэ прычэп, але вырашылі, што бочка для КАСа і плуг важней. Вельмі задаволены пакупкамі і важкай падтрымкай з бюджэту ў 294 тысячы».
Пабагацелі на новую тэхніку і іншыя гаспадаркі. Так, на мехдвары ААТ «АграБаравінка» з’явіўся новы пагрузчык і агрэгат для ўнясення вадкіх арганічных угнаенняў, у ААТ «Ляжні» – апырсквальнік і трактар МТЗ-1221.2. Комплекс для нарыхтоўкі кармоў, раскідвальнік мінеральных угнаенняў, граблі, здрабняльнік саломы набыло УП «Шумілінскі райаграсэрвіс». У КУСГП «Мішневічы» прывезлі бочку для вадкіх угнаенняў, аплацілі яшчэ і чатырохкорпусны плуг, які таксама на днях з’явіцца на мехдвары.
Дададзім, што ўсе названыя агрэгаты беларускія – вытворчасці «Бабруйскаграмаш», «Амкадор», «Лідаграпраммаш», Мінскага трактарнага завода.
Ларыса ЗАЙЦАВА.
