Выпрабаванне снегам
У выхадныя снегапады, якія накрылі раён, прыбавілі работы ўсім. Дыспетчару ДЭУ-36 загадзя паведамілі з абласной Дзяржаўтаінспекцыі пра снегапад, таму яшчэ перад тым, як ён пачаўся была накіравана тэхніка на падсыпку дарог Віцебск-Полацк і Гарадок-Ула-Камень (у межах раёна).
«Важна, каб пясчана-салявая сумесь лягла на трасу перад выпадзеннем снегу, – кажа начальнік лінейна-дарожнай дыстанцыі № 364 ДЭУ-36 РУП «Віцебскаўтадар» Віктар Прыходзька. – На дарогі выехалі два МАЗы з адваламі і раскідвальнікамі пяску, тры МТЗ, пагрузчык, газель. Чацвёра рабочых чысцілі пешаходныя пераходы і з’езды. Работа была арганізавана ў дзве змены і вялася комплексна: чысцілі і падсыпалі галоўныя магістралі раёна. За выхадныя толькі дарогу Р-20 пачысцілі чатыры разы, на падсыпку дарог патрацілі 126 тон пясчана-салявой сумесі. А ўвогуле за два дні на рахунку нашых дарожнікаў больш за тысячу кіламетраў прачышчаных дарог. Каб не было перамётаў, уздоўж аўтатрас мяркуем рабіць снежныя валы».
Ларыса ЗАЙЦАВА.