На раённую Дошку гонару занесена прозвішча Андрэя Іскола, слесара аварыйна-аднаўленчых работ Шумілінскага раёна газазабеспячэння.
У райгаз Андрэй Іскол прыйшоў 25 гадоў таму пасля тэрміновай вайсковай службы. «На работу ўладкаваўся выпадкова, – расказвае Андрэй. – Прапанавалі стаць слесарам – згадзіўся». Тады хлопец не думаў, што застанецца тут на дзесяцігоддзі.
Пасля вучобы на курсах у Віцебскім газінстытуце малады спецыяліст Андрэй Іскол прыступіў да работы. Як сам прызнаецца, яму пашчасціла, што яго напарнікам стаў вопытны Уладзімір Малахавіч Гарохаў. «Ён адразу ўзяў мяне пад сваю апеку, – кажа Андрэй. – Першая яго фраза «Газ патрабуе асцярожнасці і спакойных ўпэўненых дзеянняў» стала для мяне прафесійным законам». Андрэй Іскол і Уладзімір Гарохаў разам адпрацавалі каля 10 год, брыгада заўсёды спраўлялася на выдатна.
Чым займаецца слесар аварыйна-аднаўленчых работ Раёна газазабеспячэння? Як толькі ў дыспечарскую паступае паведамленне пра пах газу, брыгада адразу выязджае на месца, дзе ўстанаўлівае і ліквідуе прычыну ўцечкі. Слесары правяраюць стан газавага абсталявання і ўстанаўліваюць новае, праводзяць прафілактычныя гутаркі.
Апошнія восем год Андрэй працуе на пару з цёзкам –Андрэем Сухаравым. Склаўся зладжаны і спрацаваны дуэт. Гэта ў рабоце слесараў аварыйна-аднаўленчых работ вельмі важна. Брыгада шмат разоў удзельнічала у аглядах-конкурсах. І шумілінцам ёсць чым пахваліцца: летась, напрыклад, выйшлі ў фінал абласнога конкурсу, дзе занялі чацвёртаемесца, прапусціўшы наперад толькі каманды з Віцебска, Оршы і Полацка.
За чвэрць стагоддзя значна змянілася газавае абсталяванне, з’явіліся новыя электронныя прыборы і апараты, толькі вось за гэты час прынцыпы работы Андрэя Іскола засталіся ранейшымі – адказнасць, сумленнасць, прафесійнае выкананне задач.
Андрэй Іскол падзяліўся, што апошнім часам у іх сям’і з’явілася новая традыцыя. «Штовечар мы з жонкай і дачкой Дашай абавязкова глядзім «Віцебскі веснік», –кажа мужчына. –Чакаем новыя рэпартажы сына Сяргея, які працуе карэспандэнтам на абласным тэлебачанні».
Аляксандр ШЭДЗЬКО.