Жарты, розыгрышы, прыколы
Дзень тэатра адзначылі ў Шумілінскім раённым Цэнтры культуры з гумарам.
27 сакавіка ва ўсім свеце адзначаецца Дзень тэатра, і вядома ж, лепшы спосаб адсвяткаваць гэты дзень – паглядзець спектакль і акунуцца ў атмасферу творчасці і сцэнічнага чараўніцтва. Шумілінскі раённы цэнтр культуры даў магчымасць атрымаць асалоду ад тэатральнага мастацтва: артысты народнага тэатра мініяцюр «Буфф» (рэжысёр Марыя Забэла) падрыхтавалі гумарыстычную праграму «5 кадраў сямейнага жыцця» і паказалі на сцэне вясёлую і забіяцкую пастаноўку з пяці сцэн.
Жарты, розыгрышы, прыколы не пакінулі гледачоў абыякавымі – усе ад душы пасмяяліся. І ў гэтым заслуга мастакоў-пастаноўшчыкаў тэатра Аляксея Цімафеева і Таццяны Багданавай. Менавіта яны прыдумалі цікавую падачу, запісвалі відэаролікі вядучых, займаліся падборам акцёраў і рэпертуару. Пастаноўка атрымалася яскравай і відовішчнай!
Выдатна згулялі ўсе акцёры, цалкам ужыліся ў ролі сваіх персанажаў, а яркія сцэнічныя касцюмы дапоўнілі створаныя мастацкія вобразы артыстаў тэатра. Вядучыя святочнага выпуску ШумРай-ТВ канала Алена Навасная (Алена Зуева) і Георгій Прыплятайла (Георгій Нуждзін) распавялі міжраённыя навіны. Гледачы любаваліся цудоўнай гульнёй Дар’і Сцяпанавай і Андрэя Трафімава, Вольгі Барабанавай і Міхаіла Корзана, Ганны Каламіец, Ілоны Карнілавай і Крысціны Бурлаковай. Паспяхова дэбютаваў на сцэне Дзмітрый Галуза (Шумілінскі лясгас). Радуе, што ў трупе тэатра шмат маладых акцёраў.
Натхняльным прыкладам для іх служаць ветэраны сцэны. Аляксей Гарэленкоў, напрыклад, пасля доўгага перапынку зноў вярнуўся на сцэну. Вобраз жанчыны ў яго выкананні прыйшоўся гледачам па душы: гучны смех і крыкі «Брава!» таму пацвярджэнне.
Словы падзякі калектыву народнага тэатра за станоўчыя эмоцыі гучалі пасля прагляду – імі абменьваліся гледачы. Дарэчы, раз на тры гады народныя калектывы пацвярджаюць свае званні. Гэтым гумарыстычным выступленнем тэатр мініяцюр «Буфф» паспяхова пацвердзіў званне народнага.
Вольга КОЦІКАВА, няштатны карэспандэнт.
