Якія вуліцы адрамантуюць у Шуміліне?
Пасля зімы дарожнае пакрыццё вуліц таксама просіць рамонту. Ужо вызначана, якія вуліцы будуць сёлета рамантавацца.
«Зразумела, што асноўны крытэрый, дзе будзе весціся бягучы рамонт, – стан дарогі, – адзначыла намеснік начальніка аддзела архітэктуры і будаўніцтва, жыллёва-камунальнай гаспадаркі райвыканкама Ірына Карпава. – Усяго плануецца адрамантаваць амаль 6300 квадратных метраў – участкі дарогі па вуліцах Луначарскага (ад вуліцы 40 год Кастрычніка да вуліцы Дачнай), Светласельскай (ад трасы Р-20 да перакрыжавання з вуліцай Суворава), С. Т. Пальвінскай і Лескавіцкай. Дарэчы, уся актуальная інфармацыя пра бягучы рамонт дарог размешчана на афіцыйным сайце райвыканкама». Бягучы рамонт дарог распачнецца ў маі.
Паралельна будзе весціся ямкавы рамонт на дарогах і грэйдзіраванне. Гэтыя віды работ праводзяцца пры неабходнасці. Сёлета плануецца зрабіць бягучы рамонт як мінімум 6 прыдамавых тэрыторый: у Шуміліне каля дома № 82 па вуліцы Сіпко і дома № 16 па вуліцы 70 год БССР, у аграгарадку Слабада каля да-моў №№ 30, 32, 34 па вуліцы Прыазёрнай, у аграгарадку Мікіціха – тры прыдамавыя тэрыторыі па вуліцы Ласкунова. Пры бягучым рамонце прыдамавых тэрыторый будзе захаваны ранейшы тып пакрыцця (асфальт ці пакрыццё са шчэбеню).
Аляксандр ШЭДЗЬКО.
