Стаўку робяць на пшаніцу
У ААТ «Прыазёрны мір» пачалася сяўба азімых зерневых. Асноўны сеяльшчык тут – малады механізатар Вадзім Гарланаў (на здымку).
«У сярэднім мяркую засяваць па сорак гектараў за дзень, – расказаў Вадзім. – Зараз працую ва ўрочышчы Гародна, затым пераеду ў Пісарава і Во-йлавічы. Зерневыя засяваю пасля рапсу і шматгадовых траў – яны добрыя папярэднікі, бо назапасілі ў глебе азот, які неабходны культурам. Дарэчы, у гаспадарцы зроблены добры задзел на будучае – мы засеялі сёлета 600 га шматгадовых траў, якія на наступны год будзем убіраць на сянаж».
Сельгаспрадпрыемства сёлета засявае 1100 га азімых культур, гэта на 250 га больш, чым у мінулым годзе. І зразумела чаму – азімыя даюць лепшы ўраджай. «Стаўку робім на пшаніцу, пад яе адвялі 700 гектараў, – расказаў дырэктар Мікалай Жыгуноў. – Яна больш прадукцыйная, карыстаецца попытам і каштуе даражэй – па 460 руб за тону. Разам з гэтым сеем трыцікале і жыта. Насенне ўсё маем уласнае. Па тэхналогіі сяўбу трэба завяршыць да 25 верасня. Павінны справіцца, калі надвор’е не падвядзе».
Ларыса ЗАЙЦАВА.
