«Ветэраны па пашпарце,
маладыя ў душы …”
Багата мерапрыемстваў прайшло ў раёне ў Дзень пажылых людзей.
У гарадскім Доме культуры было арганізавана “Незвычайнае падарожжа”. Прама ў фае сустракалі выставы захапленняў ветэранаў: гаспадыні Л. П. Вараб’ёва і Л. У. Журава дэманстравалі хатнія кветкі, а Л. П. Сафончык – вырабы з бісеру.
На мерапрыемстве прысутнічалі старшыня раённага Савета дэпутатаў І. М. Новікава, дэпутат Палаты прадстаўнікоў Нацыянальнага сходу Рэспублікі Беларусь У. У. Шыцько, старшыні сельвыканкамаў, намеснікі па ідэалагічнай рабоце арганізацый і прадпрыемстваў раёна.
Вядучыя адразу адзначылі, што мерапрыемствы да Дня пажылых людзей сталі ў раёне добрай традыцыяй, гэты дзень можна з лёгкасцю назваць днём удзячнасці пажылым людзям за іх самаахвярную працу, за жыццёвы вопыт…
Арганічна ўпісалася ў праграму свята і прывітанне ад малышоў з дзіцячага садка № 2, малыя шчыра і з гумарам павіншавалі сваіх дзядуль і бабуль са святам.
Грунтоўна і падрабязна расказала асноўныя накірункі дзейнасці ветэранскай арганізацыі старшыня раённага савета ветэранаў К. Ф. Палоўнікава. Кацярына Фамінічна падкрэсліла, што ветэраны – своеасаблівая катэгорыя людзей. З аднаго боку, ім, як нікому іншаму, патрэбна пастаянная ўвага грамадскасці, улады, грамадскіх арганізацый. А з другога боку, дзякуючы багацейшаму жыццёваму вопыту і невычэрпнай энергіі, яны з’яўляюцца незаменнымі ў патрыятычным выхаванні моладзі.
На сцэну запрашаюцца ветэран працы, член прэзідыума раённага савета ветэранаў, жыхар Шуміліна Антон Антонавіч Цынгель, старэйшына вёскі Сянькова Сіроцінскага сельсавета Еўфрасіння Сысоеўна Лявонава і член прэзідыума раённага савета ветэранаў жыхар Шуміліна Тадэвуш Мацвеевіч Тарыма. За актыўную жыццёвую і грамадзянскую пазіцыю ім прысвоена званне “Ганаровы ветэран”. Знак “Ганаровы ветэран” уручае У. У. Шыцько (на здымку ўверсе). Уладзімір Уладзіміравіч напачатку павіншаваў шаноўных ветэранаў з узнагародай, выказаў словы ўдзячнасці і пажадаў усім моцнага здароўя. Дэпутат выказаў цвёрдую упэўненасць, што ветэранскі рух заўсёды будзе адыгрываць значную ролю ў грамадска-палітычным жыцці краіны.
І. М. Новікава адзначыла, што ў зале сабраліся “ветэраны па пашпарце, маладыя ў душы”. “Сёння ў раёне пражывае 6233 чалавекі пенсійнага ўзросту, з іх амаль тысяча працуе, ветэраны актыўна ўдзельнічаюць ва ўсіх мерапрыемствах”, – сказала Ірына Мікалаеўна.
У раённым аглядзе-конкурсе “Зямля мая – мой родны дом” бралі ўдзел звыш ста гаспадароў сядзіб з усяго раёна, на конкурс іх вылучылі сельвыканкамы, грамадскія арганізацыі і жыхары раёна. І. М. Новікава ўручыла дыпломы і каштоўныя падарункі А. В. Шыёнак (в. Лялюгі), З. В. Уробушкінай (в. Пабеда), Л. А. Грыгор’евай (а.-г. Мікіціха), Н. Р. Бараноўскай (в. Барэц), Ф. П. Юрке-вічу (а.-г. Мішневічы) (на здымку), І. І. Мікульчыку (г.п. Обаль), Ф. А. Лапавухавай (в. Сіроціна), Р. А. Лапавухавай (в. Сіроціна), В. С. Ушал (в. Мішкавічы) і З. Я. Жандаравай (в. Язвіна) за актыўны ўдзел у конкурсе, узорны парадак і эстэтычнае ўтрыманне прыдамавой тэрыторыі. Таксама Ірына Мікалаеўна ўручыла граматы Віцебскай абласной арганізацыі Беларускага грамадскага аб’яднання ветэранаў жыхаркам Шуміліна Э. І. Грэчка і А. А. Леўчанковай.
Яшчэ больш чым дваццаць гаспадароў былі адзначаны за актыўны ўдзел у аглядзе-конкурсе, ім удзячнасці і каштоўныя падарункі ўручыла К. Ф. Палоўнікава.
Напрыканцы мерапрыемства выступіла старшыня раённай арганізацыі грамадскага аб’яднання “Ахова птушак Бацькаўшчыны” (АПБ) І. У. Сінкевіч. Іна Уладзі-міраўна расказала прысутным аб сумесным праекце раённага Цэнтра дзяцей і моладзі, АПБ і ветэранскай арганізацыі “Птушкам усе ўзросты падуладны”.
Пад гукі раманса “Белай акацыі …”
Пярвічныя ветэранскія арганізацыі аддзела адукацыі, СШ №1 і СШ №2 і райкам прафсаюза педагагічных работнікаў выступілі ініцыятарамі мерапрыемства, якое прайшло ў СШ №1. “Каля 150 чалавек аб’ядноўвае наша ветэранская арганізацыя, – дзеліцца старшыня раённай ветэранскай арганізацыі педагагічных работнікаў Л. Ф. Мурашка. – Стала добрай традыцыяй праводзіць мерапрыемствы ў пачатку кастрычніка, тым больш, што тут адразу два святы – Дзень пажылых людзей і Дзень настаўніка”.
Начальнік раённага аддзела адукацыі П. У. Спірыдонаў шчыра павіншаваў калег са святам. “Вы застаяцеся калегамі, педагогамі, настаўнікамі”, – падкрэсліў Пётр Уладзіміравіч. Словы ўдзячнасці і пашаны адрасавала старэйшым калегам і старшыня райкама прафсаюза педагагічных работнікаў Г. Ф. Раманенка. Усім да душы прыйшоўся творчы падарунак дырэктара СШ №1 В. В. Мяньковай. Валянціна Васільеўна выканала раманс “Белай акацыі …” з мастацкай стужкі “Дні Турбіных”. Зразумела, не абышлося і без канцэрта, які падрыхтавалі вучні СШ №1.
А далей была шчырая гаворка за кубкам чаю, гаварылі пра жыццё-быццё, успаміналі сур’ёзныя і кур’ёзныя выпадкі з педагагічнай работы. Дзве гадзіны сустрэчы праляцелі як адно імгненне.
Птушкі і пераемнасць пакаленняў
Ветэраны актыўна ўключыліся ў экалагічны праект “Птушкам усе ўзросты падуладны”. Рэалізуюць праект для ветэранскай арганізацыі раённае аддзяленне грамадскай арганізацыі “Ахова птушак Бацькаўшчыны” (АПБ) і раённы Цэнтр дзяцей і моладзі. Таму і была арганізавана адмысловая сустрэча для сваіх новых сяброў з ветэранскай арганізацыі.
За кубкам гарбаты пад акардэон адбывалася сустрэча. Арыгінальная віктарына, прапанаваная работнікамі Цэнтра, лёгка, праз усмешку і гумар, перанесла пажылых экалагічных актывістаў у казачны свет дзяцінства. Такі лёгкі і няўрымслівы пачатак мерапрыемства надаў агульны тон усёй сустрэчы.
Неўзабаве гутарка перайшла на птушак – новае захапленне нашых ветэранаў. І вось ужо вырашана, што яны прымуць удзел у восеньскіх падліках птушак.
З усмешкамі успомнілі ветэраны паход на Обальскае балота (праўда, тады многім было не да смеху) і экскурсію на Казьяншчыну. Любоў да роднай зямлі, да прыроды аб’яднала некалькі пакаленняў – гэта і ёсць пераемнасць.
Тэкст і фота Аляксандра ШЭДЗЬКО.
Надрукавана ў №79 ад 05.10.2012 г.