«Калі працаваць, дык шчыра і сумленна»
На Дошку гонару Шумілінскага раёна занесена прозвішча трактарыста па падрыхтоўцы лесасек, тралёўцы і вывазцы лесу Шумілінскага лясгаса Андрэя Сяргеевіча САЛАЎЁВА.
Андрэй Салаўёў працуе ў лясгасе 13 год. Кажа, што ўладкаваўся ў лясгас выпадкова, хаця яго бацька працаваў у Казьянскім лясніцтве. «Пасля школы адвучыўся ў ліцэі ў пасёлку Акцябрскім, атрымаў правы трактарыста і адправіўся праходзіць тэрміновую вайсковую службу, – расказвае Андрэй. – Пасля службы пайшоў працаваць у райспажыўтаварыства. Маё жыццё кардынальна змяніў ляснічы Казьянскага лясніцтва Уладзімір Мазейка, які прапанаваў мне перайсці на работу ў лясгас. Я вельмі ўдзячны яму за гэта».
Спачатку Андрэю Салаўёву даверылі «Фарвардар», на якім ён адпрацаваў пяць год. І толькі потым стаў трактарыстам па падрыхтоўцы лесасек, тралёўцы і вывазцы лесу. Спакойны і адказны, надзейны і сумленны. Такі Андрэй у жыцці, такі і ў рабоце. Жыве па прынцыпе: калі працаваць, дык працаваць шчыра і сумленна. Толькі тады будзе вынік. А вынікаў у Андрэя Салаёўва дастаткова: апошнія гады ён пастаянна ў прызавой тройцы ў спаборніцтвах трактарыстаў па падрыхтоўцы лесасек, тралёўцы і вывазцы лесу лясгасаў Віцебскай вобласці.
З верасня мінулага года Андрэй шчыруе ў Хальчанскім лясніцтве Жлобінскага лясгаса, разам з работнікамі Шумілінскага лясгаса дапамагае калегам справіцца з наступствамі стыхіі, якая разгулялася летась на Гомельшчыне. І зноў Андрэй Салаўёў сярод лепшых: у спаборніцтвах сярод трактарыстаў па падрыхтоўцы лесасек, тралёўцы і вывазцы лесу на яго рахунку – два трэція і адно першае месцы. Гэтыя факты мужчына сціпла пракаменціраваў: «А якая розніца, дзе працаваць: на Шуміліншчыне ці на Жлобіншчыне? Проста на любым участку прывык працаваць на сумленне…».
Аляксандр ШЭДЗЬКО
