Моладзь дэманструе прававыя веды
СШ № 2 г. п. Шуміліна стала пляцоўкай для дэманстрацыі прававых ведаў і навыкаў: тут прайшоў раённы фестываль прававых ведаў, у якім прынялі ўдзел 9 агітбрыгад з усіх школ раёна. Фестываль стаў платформай для больш глыбокага разумення юрыдычных прынцыпаў і правоў чалавека.
Удзельнікі паклапаціліся пра шырокі спектр тэм, праз якія адлюстравалі актуальныя пытанні прававога жыцця ў краіне. Кожная агітбрыгада прадставіла сваё бачанне праблем, з якімі сутыкаюцца маладыя людзі, і прапанавала шляхі іх вырашэння. Гэта прадэманстравала імкненне моладзі быць актыўнымі ўдзельнікамі грамадскага жыцця.
Журы фестывалю, якое ўзначальвала намеснік старшыні камісіі па справах непаўналетніх райвыканкама Юлія Уласевіч, адзначыла высокі ўзровень падрыхтоўкі ўдзельнікаў, не толькі юрыдычную кампетэнтнасць, але і творчую падачу прэзентацый. Дзякуючы гэтаму фестываль стаў не проста спаборніцтвам, а магчымасцю маладым правазнаўцам падзяліцца сваімі ведамі і ідэямі.
У старэйшай групе журы вызначыла наступныя прызавыя месцы: другое месца падзялілі «Пазітыў» з Амбросавіцкай БШ і «ПРАВАлайк» з СШ № 1 г. п. Шуміліна, трэцяе месца – «Новае пакаленне» з Кардонскай СШ. А ў сярэдняй групе другое месца прысуджана камандзе «Поспех» Башнёўскай БШ, трэцяе – агітбрыгадзе «Іскрынка» Мішневіцкай БШ.
Асобна быў адзначаны ўдзел Ганны Вежнавец з Обальскай СШ, якая ўзяла ўдзел у алімпіядзе прававых ведаў і паказала лепшы вынік.
Вучні нагадалі, што прававую асвету трэба весці не праз забароны, а праз разуменне, праз цікавыя для моладзі формы, падкрэсліла Юлія Уласевіч.
Усе прызёры фестывалю прававых ведаў атрымалі памятныя падарункі.
Аляксандр ШЭДЗЬКО.
