«БАШНЁЎСКАЯ ЮШКА» – ГАСТРАНАМІЧНЫ БРЭНД СВЕТЛАСЕЛЬСКАГА СЕЛЬСАВЕТА
У аграгарадку Башні прайшло цёплае, душэўнае і па‑сапраўднаму смачнае свята, якое арганізавалі работнікі мясцовых клуба і бібліятэкі.
На свята сабраліся жыхары аграгарадка і госці, каб разам згадаць вясковыя традыцыі, сустрэцца з сябрамі і добра правесці час. Ну, і зразумела, згатаваць смачную юшку ці пачаставацца ёй ад гасцінных вяскоўцаў.
За званне лепшых майстроў па прыгатаванні юшкі змагаліся пяць каманд. Самай смачнай журы прызнала юшку з чатырох сартоў рыбы маладзёжнай каманды аграгарадка Башні ў складзе Мікіты Кавалёва, Арцёма Аксюты, Ягора Бяззубенкі.
Таксама частавалі юшкай мясцовыя жыхары Сяргей і Марына Аляксеенкі, Анатоль і Ала Сафончыкі, Валянціна і Віктар Скірманы, Аляксандр Пашкевіч.
Пакуль гатавалася юшка, госці і ўдзельнікі свята фатаграфаваліся каля прыгожай фотазоны. Усіх прысутных творчымі нумарамі радавалі артысты раённага цэнтра культуры і ўдзельнікі ўзорнага калектыву «Прэм’ера» на чале з рэжысёрам Людмілай Арэхавай.
У свяце, якое аб’яднала мясцовых жыхароў і дачнікаў, дарослых і дзяцей, бралі ўдзел загадчык сектара культуры райвыканкама Ірына Ласянкова, старшыня Светласельскага сельсавета Валерый Шчамялёў, былы кіраўнік мясцовага сельгаспрадпрыемства ветэран працы Леанід Пагарэльскі.
Ларыса ЗАЙЦАВА.
