Рыхтуюць дарогі да зімы
Зараз работнікі ДРБУ-204 праводзяць рамонтнае прафіляванне дарог, якое ў народзе называюць грэйдзіраваннем.
Нядаўна сталі сведкамі, як вялося рамонтнае прафіляванне на аўтадарозе Шуміліна‑Башні‑Цербяшова. Калі вясной дарожнікі робяць ухіл да абочын (каб сцякала вада), то восенню – да сярэдзіны дарогі дзеля бяспекі транспартных сродкаў падчас галалёдзіцы.
«На прадпрыемстве ёсць два грэйдары, работы вядуцца кожны дзень, – расказаў начальнік ДРБУ-204 Уладзімір Раманаў. – Ужо зрабілі прафіляванне аўтадарог Бешанковічы-Крывое Сяло-Улазавічы, Башні-Язвіна, Бешанковічы-Шуміліна-Сураўні, Шуміліна-Башні-Цербяшова. На чарзе – дарога на Шашы і Роўнае. Будзем працаваць да таго часу, пакуль не ўстановяцца пастаянныя маразы. Мяркуем прагрэйдзіраваць усе 300 кіламетраў гравійных дарог, якія знаходзяцца на нашым балансе».
