Натуральны смак «ВЕЖЫ» – на выставе ў Мінску
17 снежня ў Мінску адбудзецца чарговая сесія Савета Рэспублікі Нацыянальнага сходу Рэспублікі Беларусь восьмага склікання. У рамках сесіі будзе працаваць выстава сацыяльнаэканамічнага патэнцыялу Віцебскай вобласці. На прэзентацыі прадпрыемстваў таваравытворцаў харчовай прамысловасці Віцебшчыны Шумілінскі раён прадставіць таварыства з абмежаванай адказнасцю «ВЕЖА».
Дырэктар прадпрыемства Святлана Мікалайчык і намеснік Таццяна Мончык асабіста правядуць прэзентацыю фірменнай прадукцыі. Галоўным экспанатам стане натуральны безалкагольны напой «Шыпучка» са смакамі «маліна-бузіна» і «клубніцы». Таксама ўвазе ўдзельнікаў сесіі будзе прадстаўлены напой «Пузіроўка» з адмысловымі навагоднімі густамі «журавіны», «яблык-вінаград-апельсін» і «маліна-яблык». Гэты напой «ВЕЖА» вырабляе толькі на экспарт, для буйной расійскай сеткі «ВкусВилл». Магчыма, пры значным попыце з боку беларускага спажыўца ў перспектыве ён з’явіцца і на нашым рынку.
Дар’я ЧАПУРНОВА.
