Мясцовае кіраванне: сумесная работа больш эфектыўная
Як рэалізуецца Закон Рэспублікі Беларусь «Аб мясцовым кіраванні і самакіраванні ў Рэспубліцы Беларусь» на тэрыторыі Светласельскага сельсавета, выконваюцца сацыяльныя стандарты ў вобласці электрычнай сувязі – гэтыя пытанні былі вынесены для разгляду на пасяджэнні прэзідыума раённага Савета дэпутатаў 29 склікання.
Пасяджэнне правёў старшыня раённага Савета дэпутатаў Руслан Матвейчук.
Аб мясцовым кіраванні і самакіраванні на тэрыторыі Светласельскага сельсавета расказаў старшыня сельвыканкама Валерый Шчамялёў. «За мінулы год дэпутатамі сельскага Савета дэпутатаў праведзены 84 прыёмы, паступіла 41 пытанне, вырашана 40, – адзначыў Валерый Аляксандравіч. – Станоўча вырашаны пытанні па пад’ездах да грамадзянскіх могілак, абкосу прыпыначных пунктаў, абнаўленні дарожнага пакрыцця пасля правядзення тэхнічных работ і іншыя.
На кантролі застаецца пытанне дарожнага пакрыцця вуліц у Язвіне. Адна з эфектыўных форм сувязі дэпутатаў з насельніцтвам – правядзенне сустрэч і справаздачы аб дэпутацкай дзейнасці ў выбарчых акругах. Падчас справаздач у студзені паступіла 7 праблемных пытанняў, пяць з якіх ужо вырашаны, 2 перададзены службам». Дэпутаты працуюць у цесным супрацоўніцтве са старэйшынамі вёсак, якіх на тэрыторыісельсавета зараз 13.
Начальнік участка электрычнай сувязі Юрый Маскалькоў прааналізаваў работу ўчастка і адзначыў, што на тэрыторыі раёна ўсе тры сацыяльныя стандарты па электрасувязі ўкаранёныя, забяспечана іх стопрацэнтнае выкананне.
Праводзяцца работы па будаўніцтве валаконна-аптычных ліній сувязі. На бягучы год запланавана ўвядзенне ў эксплуатацыю сетак у Обалі, Мішневічах і Мікалаеве – жыхарам гэтых населеных пунктаў будзе прадастаўлена магчымасць карыстацца паслугамі інтэрнэту і інтэрактыўнага тэлебачання
ў новай якасці.
На пасяджэнні разгледжана пытанне змянення назвы Маладзёжнага парламента пры раённым Савеце дэпутатаў. Цяпер ён будзе мець назву Маладзёжны савет, неўзабаве пройдуць выбары новага старшыні.
Ларыса ЗАЙЦАВА.
