Новыя перамогі юных канцэртмайстраў
25 лютага на базе Віцебскага дзяржаўнага музычнага каледжа імя І. І. Салярцінскага адбыўся III адкрыты конкурс юных канцэртмайстраў «Віват, канцэртмайстар!». Сёлета ён сабраў 68 удзельнікаў з 24 школ мастацтваў Віцебскай вобласці. У лік пераможцаў трапілі таленавітыя выхаванцы Шумілінскай дзіцячай школы мастацтваў.
Вучні і іх педагогі годна прадставілі раён на конкурсе абласнога маштабу і заваявалі шэраг прэстыжных узнагарод. Звання лаўрэата III ступені ўдастоены адразу двое вучняў школы: Ганна Фурсіна, якая выступала ў пары з флейтыстам Іванам Кузняцовым (настаўнікі Ганна Пахоменка і Іна Ворса) і Ігар Пальвінскі (настаўнік Алена Ананіч). А яго родная сястра вакалістка Вольга стала ілюстратарам і падтрымкай брата на конкурсе (настаўнік Алена Сініцкая). Гэтак жа Ігар Пальвінскі быў адзначаны спецыяльным дыпломам «За волю да перамогі», які пацвярджае яго мэтанакіраванасць і артыстызм.
Дыплом I ступені адправіўся ў гарадскі пасёлак Обаль. Яго ўладальнікам стала Аліса Мулькова (Обальскі філіял Шумілінскай ДШМ, настаўнік Наталля Іванова). У якасці ілюстратара выступіла цымбалістка Ульяна Шульц.
Удзел шумілінскіх музыкантаў у конкурсе юных канцэрстмайстраў стаў ужо добрай традыцыяй. А іх вяртанне дадому з перамогамі дазваляе настаўнікам і далей з яшчэ большым энтузіязмам развіваць выканальніцкую творчасць дзяцей, павышаць узровень майстэрства навучэнцаў.
Дар’я ЧАПУРНОВА.
