Задумацца. Спыніцца перад безданню
На мінулым тыдні пад кіраўніцтвам намесніка старшыні райвыканкама А. М. Зайцава адбыліся чарговыя пасяджэнні савета грамадскага пункта аховы парадку і назіральнай камісіі. У поле зроку трапілі выключна тыя грамадзяне, якія любяць у нецвярозым стане пашукаць сабе прыгод, а таксама грамадзяне, якія нядаўна вызваліліся з месцаў зняволення.
Напачатку члены камісіі размаўлялі з так званымі “сутачнікамі”. Мужчыны атрымалі ад трох да сямі сутак з-за сваёй празмернай цягі да спіртнога. Пасля выпітага двое ўчынілі сямейныя скандалы, а адзін па дарозе дадому ўпаў з веласіпеда і заснуў. Невядома, чым бы закончыўся сон на марозе, калі б не супрацоўнікі міліцыі. Усе гэтыя аматары “зялёнага змія” ўжо адной нагой стаяць у лячэбна-працоўным прафілакторыі.
На камісію прыйшоў 35-гадовы мужчына, якому суд ужо вынес пастанову аб накіраванні ў ЛПП. І яго неаднойчы папярэджвалі, што празмерная цяга да спіртнога дабром не закончыцца. Толькі вось мужчына да гэтых слоў не прыслухоўваўся, ды і алкаголікам сябе не лічыў, заяўляў, што можа кінуць піць у любы момант…
А вось малады мужчына, які сумленна працуе на адным з прадпрыемстваў раёна, сеў за руль службовага аўтамабіля нецвярозым, за што пазбавіўся вадзіцельскіх правоў і атрымаў штраф. “Што тут казаць? Вінаваты. Усё зразумела,” – менавіта так мужчына пачаў сваё апраўданне на камісіі. Было бачна, што яму няёмка тут знаходзіцца, сорамна.
На пасяджэнне назіральнай камісіі прыйшлі трое грамадзян, якія нядаўна вызваліліся з месцаў пазбаўлення волі. Ніхто з іх афіцыйна нідзе не працуе, хаця на камісіі і выказвалі жаданне мець сталую працу. Тут усё залежыць менавіта ад іх саміх, тым больш што і вакансіі ёсць. Галоўнае, каб яны самі захацелі вярнуцца да нармальнага жыцця.
Алесь САКАЛОЎ.
Надрукавана ў №26 ад 02.04.2013 г.