Каб дзеці былі занятыяЗ пачатку мая і на працягу ўсяго летняга перыяду супрацоўнікі РАУС сумесна з аддзелам адукацыі райвыканкама, райкамам БРСМ і іншымі адказнымі структурамі праводзяць міжведамасную праграму “Клопат”, накіраваную на прафілактыку безнагляднасці, дзіцячага траўматызму, ДТЗ, крадзяжоў і іншых правапарушэнняў. Што робіцца ў гэтым накірунку ў раёне? Пра гэта мы запыталіся ў спецыялістаў арганізацый, адказных за праграму “Клопат”.
Людміла Грузневіч, намеснік старшыні камісіі па справах непаўналетніх райвыканкама:
– У школах раёна правялі апытанне сярод тых падлеткаў, якія стаяць на ўліку ў камісіі па справах непаўналетніх, і жывуць у сацыяльна-небяспечных сем’ях. Прааналізавалі, чым будуць заняты такія дзеці. Многія з іх будуць наведваць школьныя ці валанцёрскія лагеры. Астатніх пастараліся працаўладкаваць на прадпрыемствы. Некалькі хлопцаў будуць працаваць у ПМК-70 ў якасці падсобных рабочых, некаторыя вясковыя школьнікі пойдуць працаваць на фермы.
Валянціна Навіцкая, галоўны спецыяліст аддзела культуры райвыканкама:
– У мерапрыемстве “Клопат” непасрэдны ўдзел прымаюць і работнікі культуры. Тэма летняга адпачынку дзяцей і іх занятасці абмяркоўвалася на раённай нарадзе клубных і бібліятэчных работнікаў. Кожная ўстанова культуры мае план работы на летні перыяд з дзецьмі і падлеткамі. Графікі работы ў многіх зменены – летам будуць працаваць дадатковыя гурткі ці аб’яднанні па інтарэсах. Ды і вячэрнія мерапрыемствы з выкарыстаннем розных форм работы будуць ладзіцца значна часцей: па серадах, пятніцах, суботах і нядзелях. Работнікі ўстаноў культуры будуць выязджаць у школьныя лагеры з забаўляльнымі праграмамі, канцэртамі, спектаклямі.
Алена Селязнёва, інспектар інспекцыі па справах непаўналетніх:
– Задача супрацоўнікаў РАУС – забяспечыць парадак і бяспеку на вуліцах і дарогах. Мы будзем дзяжурыць у лагерах кругласутачнага прабывання, прыязджаць з прафілактычнымі гутаркамі і лекцыямі ў школьныя лагеры. На працягу лета будзем праводзіць начныя рэйды. Пад асаблівы кантроль узялі тых 26 падлеткаў, якія знаходзяцца на ўліку ў інспекцыі па справах непаўналетніх, 10 падлеткаў, якія стаяць на ўнутрышкольным кантролі. Усе яны летам будуць занятыя. Стараемся працаўладкаваць і пракантраляваць 248 хлопцаў і дзяўчат, якія жывуць у нядбайных сем’ях.
Кацярына Галуза, галоўны спецыяліст аддзела адукацыі:
– Выдатна адпачыць дзецям можна і ў аздараўленчых лагерах, што працуюць летам на тэрыторыі раёна. У гэтым годзе аздараўленчы лагер “Дружба” ў Амбросавічах будзе працаваць у чатыры змены. Дзеці могуць адпачыць у лагеры “Пунсовы ветразь”, што ў Лескавічах. Будзе створаны і 21 школьны лагер. Як бачна, у дзяцей ёсць выбар, дзе бавіць свой час. Цэнтр дзяцей і моладзі на працягу лета прапануе дзецям розныя гурткі.
Аляксандр Хмарын, першы сакратар райкама БРСМ:
– Для падлеткаў будуць арганізаваны валанцёрскія лагеры. Яны будуць створаны пры СШ №1 і СШ №2. У СШ № 2 лагер “Альтаір” будзе працаваць ў канцы чэрвеня-ліпені. Набіраем атрад з трыццаці чалавек. Гэта ў асноўным “цяжкія” падлеткі. У валанцёрскім лагеры “Альтаір” рабяты змогуць не толькі адпачыць, але і зрабіць многа карысных спраў: навесці парадак на брацкіх могілках, прапалоць школьныя клумбы і зрабіць яшчэ шмат карысных спраў.
Сяргей Каржуеў, начальнік аддзела па фізічнай культуры, спорту і турызму райвыканкама:
– Пры шумілінскай дзіцяча-юнацкай спартыўнай школе ў чэрвені і жніўні будуць працаваць спартыўныя лагеры. На першую і трэцюю змены набіраем па пяцьдзясят чалавек. На Дзень Незалежнасці, Купалле і іншыя святы дзеці будуць задзейнічаны ў розных спартыўных мерапрыемствах. І ў любы свабодны дзень можна прыходзіць да нас на стадыён, гуляць у валейбол ці футбол.
Гутарку вяла Ларыса ЗАЙЦАВА.
Надрукавана ў №43 ад 04.06.2013 г.
