Жыву ў Беларусі і тым ганаруся!
3 ліпеня жыхары Беларусі прызналіся ёй у бязмежнай сваёй любові. Гэта прызнанне гучала ў песнях і свяцілася ва ўсмешках, схілялася ў паклоне перад помнікам Салдату і звінела хвілінай маўчання, яго разам
з чырвона-зялёным сцяжком горда ўздымаў светлавалосы хлопчык, які ў гэты дзень зразумеў, што ён не проста хлопчык, а ён – беларус, сын гордага, нескаронага, бязмерна шчырага народа, зразумеў, чаму яго прадзед ні секунды не сумняваўся, аддаючы сваё жыццё за свабоду роднай зямлі.
Памяць. Яна сапраўды жыве ў нашых сэрцах. І мы асабліва ярка адчуваем гэта менавіта ў такія дні, як 3 ліпеня. І не саромеемся ў гэты дзень прызнавацца сваёй Радзіме ў любві, абяцаць яе абаронцам быць такімі ж моцнымі ў сваёй адданасці Айчыне.
І таму святкаванні Дня Рэспублікі мы пачынаем з мітынгаў ля абеліскаў.
Пашана вызваліцелям
На Шуміліншчыне 58 абеліскаў. Яны нібы вартавыя сцерагуць вечны сон 10 тысяч загінуўшых савецкіх воінаў. Прадстаўнічая дэлегацыя на чале са старшынёй райвыканкама У. П. Куранным раніцой 3 ліпеня накіроўваецца да брацкіх могілак у вёсках Дворышча і Тропіна. У складзе дэлегацыі і Г. Д. Жукоўская, яна прыехала ў наш раён з Луганска (Украіна) на магілу свайго дзеда Істоміна А. Я.
На брацкіх могілках у Дворышчы ўжо чакаюць вучні Слабадской СШ, мясцовыя жыхары. Старшыня Сіроцінскага сельвыканкама С. У. Каржуеў выказвае словы падзякі воінам, якія цаной свайго жыцця заваявалі незалежнасць нашай краіны, мірнае і спакойнае жыццё для нас. Хвіліна маўчання. Да падножжа помніка кладуцца вянок ад кіраўніцтва раёна, кветкі. Воінскія знакі пашаны загінуўшым байцам ад салдат Беларускай Арміі –стрэлы салюту, страявы марш салдат 103-й асобнай гвардзейскай мабільнай брыгады.
Шчырыя словы падзякі вучням мясцовай школы, жыхарам Шуміліншчыны за ўвагу і клопат пра воінскія могілкі, за пашану і памяць да іх, кажа Г. Д. Жукоўская. Яна частуе дзяцей украінскімі абрыкосамі.
Мемарыяльны комплекс ў Тропіне. Ля абеліска ў ганаровай варце стаяць піянеры, да якіх далучаецца і воінскі каравул. І зноў – словы падзякі вызваліцелям, кветкі да помніка, салют і ўрачысты марш віцебскіх дэсантнікаў.
У Шуміліне святочная калона пад гукі духавога аркестра рухаецца да брацкіх могілак. Мітынг. “Гэтае свята заваявана крывёю і ратным подзвігам тых, хто не шкадуючы сваіх жыццяў, змагаўся за незалежнасць Радзімы, – гаворыць старшыня райвыканкама У. П. Куранны. – Усе мы разам і кожны з нас паасобку нясе адказнасць за будучае нашай дзяржавы. Нас яднае любоў да Радзімы, вернасць традыцыям і шчырае жаданне зрабіць сваю краіну яшчэ больш моцнай, прыгожай і камфортнай”.
Самае дарагое свята – гэта Дзень Незалежнасці нашай Беларусі, пераканана ўдзельніца партызанскага руху З. Ф. Юрчанка.
Кожны з нас павінен працай мацаваць незалежнасць нашай краіны, дадае будаўнік, “Чалавек года Віцебшчыны-2012” А. В. Дарожкіна.
Хвіліна маўчання. Да падножжа абеліска, да вечнага агню кладуцца кветкі. Салдаты залпамі салютуюць у мірнае неба. Дзякуючы тым, хто абараняў гэты мірны дзень, мы маем права на свята.
І свята ў разгары. Яно, як вітраж, складаецца з мноства яркіх прыгожых часцінак.
У цэлым рэжысёрам свята выдатна ўдалося падкрэсліць яго галоўную лінію: мы – беларусы, мы багатыя памяццю, багатыя традыцыямі, багатыя душой. Гэта вельмі ярка адчувалася ў “Горадзе майстроў”, дзе сёлета сельсаветам прапанавалі паказаць рэгіянальныя абрады святаў народнага і сямейна-бытавога календара. І, як аказалася, гэта было нескладана, бо нейкія асобныя элементы мы выкарыстоўваем і сёння. І беларуская мова, якая яна тут нам родная, хіба ж так трапна скажаш на якой іншай.
Не толькі раённая камісія, якую, дарэчы, узначальвалі старшыня раённага Савета дэпутатаў І. М. Новікава і намеснік старшыні райвыканкама А. П. Быкаў, але і многія жыхары і госці Шуміліна атрымалі асалоду ад гэтых кароткіх каларытных спектакляў. У некаторых гэта было так натуральна, што здавалася, усё адбываецца на самой справе. Не кажу пра Обальскі сельсавет, які паказваў цікавы абрад Хрэсьбін – тут выступалі прафесіяналы, знакаміты гурт “Гарэзнікі”, але ж і дзяўчынкі з Мішневіцкага сельсавета, як лёгка без усялякай напругі (бо пра сваё ж, роднае) яны расказваюць пра свята “Багач”. А на фоне аўтэнтычных песень пажылой спявачкі Евы Мікітаўны Віднікевіч усё выглядае проста захапляюча.
Не спыняецца ў творчых пошуках раённае таварыства інвалідаў. Ну, проста малайцы! Яны ўспомнілі досыць забыты абрад абмывання даёнак, які калісьці выконвалі ў маі на свята Юр’я, і паказалі яго весела, нязмушана, зноў уразілі сваёй фантазіяй і адзінствам.
Тэатралізаванае шэсце
А тэму беларускіх святаў працягвае тэатралізаванае прадстаўленне-шэсце “Беларусь святочная”. Перад работнікамі культуры стаяла вельмі складаная задача пры арганізацыі такога дзейства. Адна справа паказаць тыя ж Калядкі са сцэны ў Доме культуры і зусім іншая – зрабіць з гэтага маштабнае вулічнае прадстаўленне для некалькіх соцень чалавек. І трэба сказаць, што рэжысёр свята Л. А. Дарзнек, звукааператар У. В. Раманаў і ўсе ўдзельнікі выдатна справіліся з задачай. Кола гадавых святаў – Калядкі з цыганамі і казой, Масленіца з блінамі, Вялікдзень з чырвонымі яйкамі, зялёныя святкі з Сёмухай і Тройцай, Купалле з вяночкамі, Багач са снапамі і караваем – перад вачыма гледачоў паўстаюць такія знаёмыя, родныя вобразы, жарты, танцы… І ўсё гэта прасякнута шчырай любоўю да нашага, беларускага…
А дыктар гучна звяртаецца да ўсіх і кожнага: “Паклонімся ж нізка, да самай зямлі, свайму народу, які збярог адзін з найкаштоўнейшых скарбаў сваіх – традыцыі і святы. Перадаў гэты скарб нам у надзеі, што мы перададзім яго сваім дзецям, унукам, праўнукам, а тыя, у сваю чаргу, зберагуць яго для сваіх нашчадкаў”.
Парад тэхнікі
А на плошчы – парад тэхнікі, які з асаблівым нецярпеннем чакалі дзеці. Дзе яшчэ ўбачыш адразу столькі трактароў, машын, камбайнаў, сеялак і розных спецыялізаваных машын! Магутныя МАЗы, КЗРы, энерганасычаныя трактары адзін за адным праязджаюць перад гледачамі. Такая сучасная тэхніка працуе сёння на палях Шуміліншчыны.
Песні – ад «Чараўніц»
Упрыгожвае свята, скарае шумілінскага слухача сваімі спевамі легендарна вядомы мінскі калектыў “Чараўніцы”. Гэта надае і без таго гучнаму святу асаблівы імпульс. Ці пра каханне, ці пра Радзіму спяваюць дзяўчаты – песні адгукаюцца радасцю ў сэрцы кожнага, хто разам з усёй краінай адзначае Дзень Незалежнасці. Спявачкі віртуозна іграюць на музычных інструментах, вядуць дыялог з гледачамі, робяць ўсё для таго, каб народныя гулянні, што разгарнуліся ў горадзе, набылі грандыёзнасць і размах.
Дзеці самі – свята
Свае кветкі ў прыгожы вянок свята ўплятаюць дзеці. Свае таленты яны дэманструюць у канцэрце “Спадчына бацькоў – мая спадчына”, які праходзіць у гарадскім парку. Хлопчыкі і дзяўчынкі з дзіцячых садкоў Шуміліна і Светласельскага дзіцячага сада спяваюць і танцуюць, радуюць сваёй непасрэднасцю.
“Кірмашовыя замалёўкі”
Выставы. Маленькія і вялікія , зробленыя дзіцячымі рукамі і сапраўднымі прафесіяналамі. Як, напрыклад, выстава-кірмаш вырабаў народных майстроў народнага клуба “Спадчына” “Кірмашовыя замалёўкі”. Работнікі Дома рамёстваў. А ў “Карчме” размясцілі свае вырабы члены народнага клуба нацыянальнай кухні “Разынка”.
Цэнтр дзяцей і моладзі паказаў вырабы з саломы, гліны, лазы, вязаныя і вышытыя падзелкі.
Па тэме свята прапанавалі выставу работнікі раённай бібліятэкі. “Беларусь – зямля славы ратнай”.
Каля краязнаўчага музея людзі спыняліся ля фотавыставы “З любоўю да Шуміліншчыны”, ля выставы карцін члена беларускага Саюза майстроў народнай творчасці Уладзіміра Каласкова, ля выставы фотаздымкаў жыхара а.-г. Крывое Сяло Адольфа Дзежыца.
Спартыўныя перамогі
Перамогу ў спартыўных стартах на Дзень Незалежнасці стараюцца атрымаць спартсмены. І вось ужо вызначаюцца пераможцы: Пётр Лазука – Арцём Масько (пляжны валейбол), Андрэй Квяцінскі (гіравы спорт). Яны прысвячаюць свае перамогі роднай Беларусі і яе галоўнаму святу – Дню Незалежнасці
Рок-вечарына
Вечарам 3 ліпеня – падарунак аматарам альтэрнатыўнай музыкі. Адкрывае рок-вечарыну лідар рок-гурта “Эксперымент-12” Максім Крыгін, ён пад гітару выконвае вядомыя і новыя кампазіцыі. Даспадобы аматарам рок-музыкі і “Анёл”, і “Сацыяльныя сеткі”. А далей яшчэ рокеры спяваюць па заяўках слухачоў, ахвотна выконваюць “Я цябе кахаю”, “На Ліцейным”, “Мая муза”.
На сцэну выходзяць музыкі з воінскага “Небоскрёба” са сваімі рок-н-рольнымі кампазіцыямі. Новы праект “Drim dance” паказвае шумілінскі альтэрнатыўшчык Сцяпан Забалоцкі. Феерычныя танцы Сцяпана з гітарай гледачы ўспрынялі “на ўра”.
І неба радавалася
Феерверкам шыкоўным, з прэтэнзіяй на грандыёзнасць фінішуе святкаванне Дня Незалежнасці Рэспублікі Беларусь у Шуміліне. Бадай, і гэтай святочнай ноччу ў парку не менш шматлюдна, як днём. Усе чакалі феерыі і ніхто не памыліўся ў сваіх спадзяваннях. Неба над горадам узарвалася тысячамі яскравых выбухаў, Загарэлася яркімі іскрыстымі букетамі, на радасць дзецям і дарослым. Свята ў горадзе скончылася сумесным выкананнем гімна Рэспублікі Беларусь і шчырымі шчодрымі апладысментамі.
Святочны фотарэпартаж падрыхтавалі Аліна ПЯТРОВА, Сяргей ЕРМАЛАЕЎ, Ларыса ЗАЙЦАВА, Наталля ЧАРНІЧЭНКА, Аляксандр ШЭДЗЬКО.
Надрукавана ў №52 ад 05.07.2013 г.
СПАСИБО ВСЕМ ОРГАНИЗАТОРАМ ПРАЗДНИКА! Все прошло чудесно и интересно)))) Впрочем, как всегда! Районные мероприятия проходят всегда на высоте. СПАСИБО!
Согласен… Понравилось многое. Особенно фейерверк!
А я полетала на вертолете! СУПЕР ощущения! Шумилино наше такое красивое с высоты птичьего полета!
Очень интересное шествие. Хорошо, что вспомнили белорусские народные традиции и обряды. Было здорово. Только одно замечание: почему Город мастеров в 11.00 уже не работал? Комиссия прошла, и все всё свернули и сидели пили — ни выставок, ни мастеров. Может сделать обход подворий после 13.00, чтобы люди могли посмотреть, а не только члены комиссии.
Праздник отличный. Большое спасибо организаторам.
Может хватит в парк пихать эти скульптуры. Там скоро повернуться будет негде. Есть предложение — сделать конкурс детских площадок в микрорайонах Шумилино и агрогородках. Чтобы и там появились интересные формы, качели, беседки и лавочки.
пусть будут, всеж лучше для детей, ток надо еще кроме парка во дворы на дет площадки