Спрашивали – отвечаем. Как поменять водительское удостоверение?

Як замяніць вадзіцельскае пасведчанне?
Чытачы сайта раённай газеты папрасілі расказаць праз раёнку пра працэдуру замены вадзіцельскага пасведчання.
Гэта пытанне мы адрасавалі начальніку ДАІ РАУС М. У. Гаралевічу. Ён параіў часцей заглядваць у вадзіцельскія правы, каб не аказалася так, што яны пратэрмінаваныя. У такім разе прыйдзецца плаціць штраф ад 5 да 20  базавых велічынь. “А ўвогуле наконт замены вадзіцельскага пасведчання да нас у ДАІ прыходзіць не трэба, – кажа Мікалай Уладзіміравіч. – Перш за ўсё варта  прайсці па месцы жыхарства медкамісію і атрымаць медыцынскую даведку ўстаноўленага ўзору. З гэтай даведкай, вадзіцельскім пасведчаннем і талонам папярэджання трэба ехаць у міжраённы рэгістрацыйна-экзаменацыйны аддзел ДАІ УУС Віцебскага аблвыканкама па адрасе: г. Віцебск, Маскоўскі праспект, д. 57.  Аддзел працуе з аўторка па суботу ўключна з 8.00. да 16.00 (з 13.00 да 14.00 – перапынак на абед). Нядзеля і панядзелак – выхадныя”.
Дарэчы, вадзіцельскае пасведчанне выдаецца на дзесяць гадоў. Але бываюць выпадкі, што яго трэба мяняць і раней. Скажам, калі чалавек змяніў прозвішча, то трэба мяняць і вадзіцельскае пасведчанне.
Атрымліваюць паўторна (а некаторыя ў трэці ці чацвёрты раз) вадзіцельскія пасведчанні і тыя, каго пазбавілі вадзіцельскіх правоў. “Для такіх абавязковы тэарэтычны і практычны экзамен, – працягвае М. У. Гаралевіч. – Але тут трэба ведаць адзін нюанс: нельга праходзіць медыцынскую камісію раней, чым за месяц да заканчэння тэрміну пазбаўлення, інакш медыцынская даведка будзе несапраўднай”.
Людміла ЗУЙКОВА.