В Добейском сельсовете прошёл подворный обход

Выяўляць праблемы
Падворны абход у Дабейскім сельсавеце праходзіў напярэдадні значнай палітычнай падзеі – выбараў у мясцовыя Саветы дэпутатаў. З 11 па 13 сакавіка групы райвыканкама абышлі ўсе населеныя пункты сельсавета, завіталі літаральна на кожны падворак. У складзе груп удзельнічалі дэпутаты Дабейскага сельскага Савета дэпутатаў, старэйшыны вёсак. Пад самым пільным кантролем дамы, дзе пражываюць адзінокія састарэлыя людзі, нядобранадзейныя сем’і.
Паднятыя вяскоўцамі ў ходзе абходу пытанні аператыўна вырашаліся старшынёй Дабейскага сельвыканкама І. І. Шалахавай, кіраўнікамі ААТ “Ляжні” В. В. Яцко і ААТ “Прыазёрны мір” А. М. Пытко.
Жыхары аграгарадка Амбросавічы прасілі адрэгуляваць вулічнае асвятленне па вуліцах Кааператыўная і Зялёная, у Дабеі – правесці грэйдзіраванне ці зрабіць падсыпку вуліц, а таксама навесці парадак у магазіне райспажыўтаварыства. Адрамантаваць дарогу прасілі жыхары вёскі Рускі.
Каб вырашыць некаторыя пытанні, патрэбны не толькі час, але, самае галоўнае, значныя фінансы. Так, жыхары вёскі Вялікія Ляжні скардзіліся на якасць вады з мясцовага водаправода. Праблема існуе не толькі ў Ляжнях, але і ў іншых вёсках, пра што добра ведаюць у райвыканкаме. Рашыць яе без замены старых водаправодных сетак на сучасныя, без стварэння станцый абезжалезвання немагчыма, а гэта патрабуе значных выдаткаў, якія для раённага бюджэту непасільныя. Патрабуецца дапамога з вобласці і рэспублікі.
У ходзе абходу члены груп засяроджвалі ўвагу вяскоўцаў на навядзенне парадку ля дамоў і на прысядзібных участках, на рамонце агароджы. Прыходзілася нагадваць гаспадарам і пра правілы ўтрымання сабак – на прывязі ці ў вальеры. А некаторым гаспадарам прыходзілася гаварыць і пра парадак у доме. Хтосьці, атрымаўшы дом ці кватэру, трымае жыллё ў парадку, робіць рамонт, а хтосьці давядзе, як кажуць, “да ручкі” адзін дом і ідзе патрабаваць ад кіраўніцтва гаспадаркі новы.
Мэта падворных абходаў – не толькі высветліць узнікаючыя пытанні, але і працаваць на апярэджанне, не дапускаць узнікнення праблемы. Рашаць такія пытанні можна і трэба сумеснымі намаганнямі – усіх службаў, з удзелам саміх вяскоўцаў.
***
Пасля падворнага абходу на Дабейшчыне засталося даволі прыемнае ўражанне. Асабліва гэта датычыцца в. Лялюгі. Тут практычна на кожным падворку жыве талковы гаспадар. “А ў нас усе стараюцца падтрымліваць парадак, – кажа старэйшына вёскі М. Ц. Лялюга. – Трэба ж, каб не сорамна было перад прыезджым чалавекам і перад самім сабой”. Пенсіянеры вёскі  былі задаволены жыццём, работай аўталаўкі і сувязістаў. Сказалі ўхвальнае слова пра старшыню сельвыканкама І. І. Шалахаву: дапамагае, не пакідае сам-насам з праблемамі. Гаспадынь цікавіла хіба адно: калі, нарэшце, дазволяць вяскоўцам трымаць свіней? Такое ж пытанне хвалявала і жыхароў вёскі Сосніна.
У Войлавічах вяскоўцы наракалі на адно: аджывае вёска. Разабралі будынак былога магазіна, сумнымі вачыма забітых дошкамі вокнаў глядзіць на свет  былы ФАП, у двухпавярховым цагляным доме даўно няма каму жыць.
Разам з тым жыхары выказвалі падзяку дырэктару ААТ “Прыазёрны мір” А. М. Пытко за ўважлівыя адносіны да чалавека, за дапамогу транспартам, калі трэба прывезці дроў. Дарэчы, у Лялюгах, Сосніне і Войлавічах той-сёй трымае кароў. Ім летам з мясцовай гаспадаркі прывезлі па некалькі рулонаў сена.
У Пісараве просяць адрамантаваць дарогу, бо калдобіна на калдобіне. Калі не падсыпаць шчэбенем, то хаця б прагрэйдзіраваць.
Вёска Дабея. Тут больш за сотню падворкаў, і праблем  і прэтэнзій тут было нямала. І  ўсе  – да камунальнай ці дарожнай службаў. Напрыклад, у шматпавярховым доме, што на вуліцы Садовай, патрабуецца рамонт швоў. З падвалам таксама праблема – стаіць вада. На гэтай жа вуліцы многім перашкаджае труба ацяплення, якая перагарадзіла дарогу да дзіцячага садка. Вяскоўцаў цікавіла, калі будзе рамонт у пад’ездах, калі адрамантуюць дарогу да грамадзянскіх могілак, да воінскага пахавання і да новых дамоў сядзібнага тыпу. Пытанне з “барадой” і па рамонце магазіна. Вяскоўцы просяць замест старога будынку з абвіслым дахам паставіць сучасны модуль. Жыхары вуліцы Цэнтральнай звярнуліся з просьбай дапамагчы вырашыць пытанне з затапленнем прыдамавой тэрыторыі ў час дажджоў. Гаспадары расказалі, што прачысціць трубу, дзе стаіць вада, самастойна не могуць.
Усе праблемы вяскоўцаў перададзены адказным службам раёна.
Сяргей ЕРМАЛАЕЎ, Ларыса ЗАЙЦАВА.