Ответ на критику

“Не прыкрыта шырмай”
Крытычны артыкул пад назвай, вынесенай у загаловак, быў надрукаваны ў № 57 ад 29 ліпеня бягучага года. Рэдакцыя газеты атрымала адказ за подпісам галоўнага ўрача цэнтральнай раённай бальніцы К. Ф. Баканава, у якім, у прыватнасці, паведамляецца:
“З’яўленне дадзенага артыкула ў вашай (нашай) газеце “Герой працы” пад назвай “не прыкрыта шырмай” стала нечаканасцю не толькі для адміністрацыі бальніцы, але і для ўсяго калектыву УЗ “Шумілінская ЦРБ” і ўжо к вечару 29.08.2014 г. ішло абмеркаванне ўзнятага пытання.
Загадам галоўнага ўрача ад 01.08.2014 г. за № 261-А была створана камісія для правядзення службовага расследавання па пытанні крытычнага матэрыялу ў арганізацыі работы аглядавага кабінета Шумілінскай ЦРП.
Камісіяй вывучана работа аглядавага кабінета, умовы прыёму ў кабінеце жанчын для медыцынскага агляду, тлумачальная акушэркі кабінета.
Устаноўлена наступнае:
Аглядавы кабінет паліклінікі размешчаны і абсталяваны згодна з праектна-каштарысным нарматывам: шырыня кабінета не больш 3-х метраў, адлегласць ад крэсла да кушэткі не больш 2-х метраў, гінекалагічнае крэсла адгароджана шырмай, у кабінеце двайныя дзверы і выпадковае заглядванне ў кабінет немагчыма. Вокны ў кабінеце затаніраваны спецыяльнай цёмнай плёнкай, якая не дае магчымасці бачыць з вуліцы што ро-біцца ў кабінеце.
У аглядавым кабінеце ЦРП пастаянна працуе не “доктар”, як пісала аўтар артыкула, а ўсяго толькі сярэдні медыцынскі работнік, акушэрка са стажам работы 2 гады, якая праводзіць медыцынскія агляды жаночага насельніцтва. У яе функцыянальныя абавязкі ўваходзіць збор анамнезу па акушэрска-гінекалагічных захворваннях, колькасці родаў, медыцынскіх абортаў, вакуум-аспірацый і г. д., таму гэта “выпрабаванне” для пацыенткі было правамоцным.
А таксама пры медыцынскіх аглядах у абавязковым парадку праводзіцца забор мазкоў на анкацыталогію (цыташчоткай), так што “буду браць аналізы” (мазкі) – абгрунтавана.
Пасля агляду акушэркай робіцца запіс у амбулаторнай карце і ў даведцы аб стане здароўя (санітарнай кніжцы), а пры неабходнасці накіраванне ў абласныя ўстановы дае толькі ўрач акушэр-гінеколаг жаночай кансультацыі, аб чым пацыентцы было сказана.
Такім чынам, з праве-дзенага службовага расследавання парушэнняў у рабоце аглядавага кабінета не выяўлена.
Аднак дадзены артыкул з газеты “Герой працы” “Не прыкрыта шырмай” разгледжана і абмеркавана ў працоўным калектыве на вытворчым схо-дзе, і адміністрацыяй бальніцы запатрабаваны ад работнікаў гуманныя і паважлівыя адносіны да пацыентаў.
Калектыў УЗ “Шумілінская ЦРБ” лічыць, што аўтар дадзенага артыкула паставіў “брудную пляму” на белы халат, не разабраўшыся: “Хто і што робіць?”, не праінфармаваўшы адміністрацыю бальніцы, не высветліўшы ў цэлым пра работу аглядавага кабінета.
З тлумачальнай акушэркі дадзенага кабінета: “За час маёй работы канфліктаў з пацыентамі не ўзнікала, а наадварот, медыцынскім абслугоўваннем усе былі задаволены”. І сапраўды, у адміністрацыю бальніцы з нагоды работы аглядавага кабінета зваротаў ніколі не паступала, ды аглядавы кабінет будавалі не мы, а па тыпавым праекце ў 1986 годзе.
Калектыў УЗ “Шумілінская ЦРБ” лічыць, што дадзены артыкул нанёс урон рэпутацыі ўстановы аховы здароўя раёна і патрабуем прабачэння праз друк.
У выпадку не разгляду абскарджання дадзенага артыкула мы маем права звярнуцца ў вышэйстаячую арганізацыю (Шумілінскі райвыканкам) ці ва ўпраўленне Віцебскага аблвыканкама”.
Ад рэдакцыі. Наша газета заўжды з павагай ставіцца да нялёгкай працы медыкаў, якім мы давяраем самае галоўнае, што ў нас ёсць – здароўе і жыццё. На старонках газеты мы з задавальненнем змяшчаем падзякі пацыентаў урачам, фельчарам, медыцынскім сёстрам, калектывам і падраздзяленням Шумілінскай ЦРБ, пішам матэрыялы пра лепшых медыкаў раёна, рыхтуем старонкі да Дня медыцынскіх работнікаў.
Але час ад часу прыходзіцца друкаваць і крытычныя матэрыялы, калі ўзровень паслуг не задавальняе нашых грамадзян і яны звяртаюцца ў газету за падтрымкай. Дарэчы, Закон Рэспублікі Беларусь “Аб сродках масавай інфармацыі” дае рэдакцыі права друкаваць матэрыялы, тым больш крытычныя, без узгаднення з аб’ектам крытыкі.
У лісце змяшчаецца вычарпальны адказ адносна санітарных і медыцынскіх нормаў да аглядальнага кабінета (хаця пэўныя пытанні застаюцца: што перашкаджае чужому чалавеку раскрыць нават і двайныя дзверы; калі гэта прыносіць маральныя пакуты пацыентам, чаму б не адсунуць і кушэтку за шырму, каб жанчыны распраналіся без небяспекі трапіць на чужыя вочы?). Праведзена і адпаведная работа з медыцынскім работнікам, на якога была скарга.
Але незразумела поза пакрыўджанага, якую занялі раённыя медыкі, бянтэжаць пагрозы ў адрас рэдакцыі, якія ўтрымліваюцца ў адказе Шумілінскай ЦРБ, тым больш, што гаворка ішла не пра ўсю бальніцу, а толькі пра асобны выпадак і асобнага работніка, які дапусціў нетактоўныя паводзіны ў адносінах да асобнага пацыента. Зразумела – гэта тлумачыцца ўплывам эмоцый “па гарачых слядах”. Але мы спадзяёмся, што медыкі раёна разумеюць, што нашай агульнай мэтай з’яўляецца павышэнне якасці абслугоўвання жыхароў раёна. Таму выказваем упэўненасць у далейшым плённым супрацоўніцтве з адміністрацыяй Шумілінскай цэнтральнай раённай бальніцы і яе калектывам.
Публікацыю рыхтавала Аліна ПЯТРОВА.
Надрукавана ў № 67 ад 02.09.2014 г.