Прадпрымальнік БАБУСЬКА сеў за руль КамАЗа
Кіраўніцтва УП “Шумілінскі райаграсэрвіс” шчыра прызнаецца, што падчас жніва без памочнікаў прыйшлося б тугавата. Прадпрыемствы райцэнтра дапамагалі тэхнікай, адпраўлялі сваіх механізатараў і вадзіцеляў працаваць на палеткі. У прыватнасці, дырэктар прадпрыемства У. А. Арлоў сярод добрых памочнікаў назваў работнікаў ДРБУ-204, ПМК-70, камунгасу.
І зараз у райаграсэрвісе працуюць шэфы. У прыватнасці, спецтрактар для пагрузкі лесу “Шумілінскага лясгасу” памяняў накірунак работы: ім вельмі зручна звозіць рулоны саломы.
Першы год “Шумілінскаму райаграсэрвісу” дапамагае індывідуальны прадпрымальнік з Шуміліна С. Д. Бабуська (на здымку). Ён адклаў усе ўласныя справы (займаецца грузаперавозкамі) і падставіў сваё надзейнае плячо райаграсэрвісу. “Нядаўна набыў КамАЗ, вось і вырашыў дапамагчы прадпрыемству, – расказаў Сяргей Джэмсавіч. – Калісьці ў маладосці працаваў вадзіцелем у былым калгасе імя Леніна. Вядома, баліць душа за ўраджай зерневых, за рапс. Хочацца, каб усё было ўбрана без страт. Працую ў райаграсэрвісе паўтара месяца, закончу дапамагаць толькі пасля таго, як будзе поўнасцю ўбраны ўраджай і пасеяны азімыя.”
Кіраўнік сельгаспрадпрыемства У. А. Арлоў вельмі хваліў Сяргея Бабуську, дзякаваў за ягоныя працавітыя рукі. КамАЗ індывідуальнага прадпрымальніка зараз перавозіць зернебабовыя і рапс.
Ларыса ЗАЙЦАВА.
Надрукавана ў № 69 ад 09.09.2014 г.