Новый прибор помогает шумилинским сотрудникам ГАИ задерживать «лихачей»

Вымярае хуткасць, здымае відэа і фатаграфуе
Нядаўна ў супрацоўнікаў ДАІ РАУС з’явілася новая тэхніка: прыбор “Бінар” для вымярэння хуткасці руху транспартных сродкаў. Прыбор каштуе 69 мільёнаў рублёў, расказаў начальнік ДАІ  М. У. Гаралевіч.
“Адначасова з вымярэннем хуткасці вядзецца запіс двух відэасюжэтаў: агульным планам – для шырокага агляду дарогі, буйным планам – для канкрэтнай машыны, што дазваляе вызначыць парушальніка ў аўтамабільным патоку, – кажа інспектар ДПС Сяргей Калянковіч. – Высокая адчувальнасць камер забяспечвае магчымасць работы ва ўмовах малой асветленасці і нават ноччу.  На адлегласці дзвесце метраў прыбор можа фіксаваць нумар машыны.  Запіс заносіцца ў архіў прыбора. Гэта значыць, у любы момант мы можам паглядзець патрэбнае відэа. Па нумары машыны вызначаем месца жыхарства ўладальніка аўто. Затым пішам рапарт і спецпоштай адпраўляем яго па месцы жыхарства парушальніка, дзе на працягу двух месяцаў ён прыцягваецца да адказнасці. У першыя дні работы з “Бінарам” толькі за адну змену выявілі 15 парушэнняў хуткаснага рэжыму”.
Калі ранейшы прыбор відэафіксацыі “Візір” можна было ўстанаўліваць толькі на пярэдняй панелі аўто, то “Бінар” – і на задняй, гэта дае магчымасць кантраляваць хуткасць аўто, якія едуць ззаду патрульнай машыны.
“Бінар” аснашчаны і фотакамерай, што дае магчымасць фіксаваць парушэнні правілаў дарожнага руху вадзіцеляў пры паркоўцы, фатаграфаваць дарожна-транспартныя здарэнні.
Дарэчы, на найбольш небяспечных участках дарогі – У Язвіне і Мікіцісе – у бліжэйшы час установяць стацыянарныя прыборы фотафіксацыі, расказаў М. У. Гаралевіч. Гэта значна аблегчыць работу дарожна-патрульнай службы і дазволіць выявіць больш парушальнікаў.
Ларыса КІСЯЛЁВА.
Надрукавана ў №50 ад 30.06.2015 г.