Каласы хіляцца да жняяркі
Шырокае палатно жытняга поля ля Рыпіншчыны. Адзін за адным па полю марудна плывуць шэсць камбайнаў. Каласы цяжка гнуцца долу. Яны пахнуць сонцам, полем і летняй свежасцю. Жытні водар бадзёрыць.
Праз некалькі хвілін на край поля пад’язджае першы камбайн. Валерый Іванавіч Тупіцын, механізатар КУСГП “Ульскі” у сельскай гаспадарцы працуе больш за дваццаць гадоў. Камбайнер згаджаецца некалькі хвілін удзяліць карэспандэнту раёнкі і расказаць пра сваю работу. Лепш адзін раз паказаць і ўсё стане зразумелым, усміхаецца механізатар. І з ім нельга не пагадзіцца. Праз хвіліну мы разам у кабіне камбайна. Тут даволі прасторна, ёсць кандыцыянер.
Працоўныя мазолістыя далоні механізатара моцна трымаюць за штурвал. А цяжкія каласы пакорліва хіляцца да жняяркі. Валерый Іванавіч час ад часу паглядвае на камп’ютар, усталяваны ў кабіне. Цікаўлюся, што можна ўбачыць на гэтым невялікім экране. “Сачу па камп’ютары за работай рухавіка і іншых сістэм камбайна, – тлумачыць мужчына. – Тут жа можна ўбачыць, ці якасна вядзецца ўборка. Камп’ютар папярэдзіць і аб аварыйных сітуацыях. Тады спыняемся, рамантуем”.
Поле шырокай залацістай дарогай цягнецца ажно да лесу. Праз некаторы час Валерый Тупіцын з радасцю паведамляе: “Бункер вось-вось будзе поўны. Якраз пад’едзем да МАЗа і высыплем жыта. У бункеры будзе каля шасці тон”.
Залатой густой ракой збожжа ліецца ў кузаў машыны. З кабіны прыемна назіраць за гэтым патокам: ні ветру табе тут, ні пылу. Праз некалькі хвілін вадзіцель МАЗа павёз збожжа на зернесушылку ў Кардон. А Валерый Тупіцын – зноў за штурвал. У гэты дзень ён планаваў намалаціць трыццаць тон зерня.
Ларыса ЗАЙЦАВА.
Надрукавана ў №60 ад 04.08.2015 г.