Депутаты Шумилинского райсовета обсудили вопросы образования, профилактики правонарушений, внесли корректировки в бюджет

Сесія раённага Савета дэпутатаў
Эфектыўна выкарыстоўваць сродкі на адукацыю

18 сакавіка пад кіраўніцтвам старшыні раённага Савета дэпутатаў І. М. Новікавай адбылася чарговая дваццаць чацвёртая сесія раённага Савета дэпутатаў. У рабоце сесіі бралі ўдзел старшыня райвыканкама А. І. Снараў, дэпутат Палаты прадстаўнікоў Нацыянальнага сходу Рэспублікі Беларусь У. У. Шыцько, дэпутат Віцебскага абласнога Савета дэпутатаў старшыня абласнога камітэта прыродных рэсурсаў і аховы навакольнага асяроддзя Р. В. Вінакураў, намеснік начальніка ўпраўлення адукацыі Л. М. Сцяпанаў. На сесію былі запрошаны кіраўнікі ўпраўленняў і аддзелаў райвыканкама, арганізацый і прадпрыемстваў, устаноў адукацыі раёна.

Развіццё сістэмы адукацыі
“Мы падводзім вынікі работы за пяць гадоў адной з буйнейшых і важнейшых галін раёна, якая займаецца навучаннем і выхаваннем нашых дзяцей. У галіне працуе каля тысячы  чалавек, на яе ідзе большая частка выдаткаў раённага бюджэту, ад яе дзейнасці залежыць падрыхтоўка будучых кадраў для ўсіх арганізацый раёна”, – адзначыла ва ўступным слове І. М. Новікава.
З дакладам “Аб выкананні Праграмы развіцця сістэмы адукацыі Шумілінскага раёна на 2011-2015 гады і задачах на 2016 год” выступіла начальнік аддзела адукацыі, спорту і турызму райвыканкама В. В. Мянькова.
Так, дашкольная адукацыя ў раёне прадстаўлена 21 установай (13 дзіцячых садоў і 8 комплексаў “дзіцячы сад-школа”), у якіх выхоўваецца 859 дзяцей (у 2011 годзе было 24 установы і 817 дзяцей). Раён поўнасцю забяспечаны месцамі ў дашкольных установах, дашкольнай адукацыяй ахоплена 75% дзяцей. Адукацыйны працэс забяспечваюць 122 педагога. Утрыманне аднаго выхаванца ў 2015 годзе каштавала 26 мільёнаў 265 тысяч рублёў за год.
Агульную сярэднюю адукацыю забяспечваюць 17 устаноў, у якіх навучаецца 1855 вучняў (у 2011 годзе было 2162 вучня), з 2015 года адзначаецца некаторы рост колькасці вучняў. За пяць гадоў аптымізацыя прайшла ў 14 школах, на 57 чалавек зменшылася колькасць педагогаў. Цяпер навучальна-выхаваўчы працэс вядуць 357 настаўнікаў. Утрыманне аднаго вучня абыходзілася раённаму бюджэту ў 2015 годзе ў 31,2 мільёна рублёў (у некаторых малакамплектных вясковых школах гэтыя выдаткі перавышаюць 100 мільёнаў рублёў), на 2016 запланавана лічба ў 34,1 мільёна.
Для падвозу 278 вучняў выкарыстоўваюцца 7 школьных аўтобусаў. 99,4% вучняў ахоплены харчаваннем, у тым ліку гарачым – 94,6% (на харчаванне пайшло ў 2015 годзе 3,019 мільярда рублёў). З мэтай больш таннага харчавання ў садах і школах вырошчваецца ўласная гародніна, садавіна, бульба.
Ва ўсіх школах раёна створана сістэма работы з таленавітымі і адоранымі вучнямі, штогод праводзяцца прадметныя алімпіяды. За 2011-2015 гады 12 вучняў сталі пераможцамі абласнога этапу алімпіяды. Стабільна расце ўзровень якасці ведаў, які за пяць год павысіўся на 7,2% і складае 49,2%. 100% вучняў займаюцца на факультатывах па розных прадметах. Як вынік, 50,6% выпускнікоў паступілі ў вышэйшыя, 41,8% – у сярэднія спецыяльныя і 3,3% – у  прафесійна-тэхнічныя вучэбныя ўстановы.
Развіваецца ў раёне сістэма спецыяльнай адукацыі, якая ахоплівае 258 дзяцей.
У рамках выканання Дэкрэта №18 “Аб дадатковых мерах па дзяржаўнай абароне дзяцей ў нядобранадзейных сем’ях” праводзіцца работа па выяўленні фактаў нядобрага становішча ў сем’ях, па абароне інтарэсаў дзяцей. За пяць год 851 дзіця прызнавалася ў сацыяльна-небяспечным становішчы, 881 было зняты з такога ўліку, у тым ліку 584 – на падставе нармалізацыі сітуацыі ў сям’і. У 2011-2015 гадах 102 дзіцяці былі адабраны ў нядбайных бацькоў і прызнаны як маючыя патрэбу ў дзяржаўнай абароне.
Выхаваўчая работа ва ўстановах адукацыі была арганізавана на падставе асноўных палажэнняў дзяржаўнай ідэалогіі і палітыкі ў сферы адукацыі. Пастаянна праводзяцца шматлікія мерапрыемствы, акцыі, экскурсіі, якія накіраваны на выхаванне патрыятызму, гонару за Бацькаўшчыну, на пераемнасць і сувязь пакаленняў.  У школах дзейнічаюць піянерскія арганізацыі, пярвічкі “БРСМ”.
І. М. Новікава, А. І. Снараў задавалі шматлікія пытанні, якія канкрэтызавалі і дапаўнялі палажэнні даклада, адзначалі, што па многіх пазіцыях паказчыкі дзейнасці адукацыйнай галіны раёна ніжэй сярэдніх па вобласці, што яна займае неналежнае месца, што вынікі работы ўстаноў адукацыі могуць быць лепшымі.
У ходзе абмеркавання пытання выступілі дэпутаты раённага Савета дэпутатаў дырэктар раённай гімназіі-інтэрната Л. У. Маладзечкіна і дырэктар Слабадской д/с-СШ А. М. Пузікава, а таксама дэпутат Светласельскага сельскага Савета дэпутатаў загадчык Светласельскага ясляў-сада Л. В. Ястрабава і старшыня Обальскага сельскага Савета дэпутатаў М. А. Будневіч.
Л. М. Сцяпанаў у сваім выступленні засяродзіў увагу на асноўных праблемах галіны: “На сучасным этапе асноўнае назначэнне сістэмы адукацыі – накіраванне дзяцей на спецыяльнасці, якія найперш патрэбныя для раёна. Трэба, каб нашы дзеці вярталіся на сваю радзіму, замацоўваліся і працягвалі нашу справу. Менавіта гэта павінна стаць асноўным крытэрыем ацэнкі дзейнасці ўстаноў адукацыі. Трэба павышаць выніковасць работы і праз яе ацэньваць эфектыўнасць выдаткаваных сродкаў. Варта строга запытаць з кожнага кіраўніка, кожнага педагога за ягоную работу, кожны на сваім месцы павінен працаваць з максімальнай аддачай”.
Леанід Міхайлавіч спыніўся на неабходнасці скарачаць выдаткі: 35 мільёнаў на вучня – гэта самы высокі паказчык у вобласці. Як адзначыў Л. М. Сцяпанаў, грошы трэба лічыць і выкарыстоўваць эфектыўна, бо калі адбудзецца плануемы пераход на фінансаванне ўстаноў адукацыі зыходзячы з нарматыўных выдаткаў на аднаго вучня, малакамплектныя школы проста не выжывуць.
Дэпутаты раённага Савета прынялі рашэнне, у якім вызначалі асноўныя задачы развіцця сістэмы адукацыі раёна на 2016 год.

Прафілактыка правапарушэнняў і злачынстваў
З інфармацыяй аб ходзе выканання рашэння раённага Савета дэпутатаў ад 26 чэрвеня 2013 года “Аб рабоце, якая праводзіцца на тэрыторыі раёна па папярэджанні правапарушэнняў і злачынстваў” выступіў начальнік аддзела ўнутраных спраў райвыканкама А. Р. Дзмітрэнка. Аналіз дзейнасці аддзела унутраных спраў паказвае, што работа міліцыі палепшылася, але супакойвацца нельга, бо раён займае ў вобласці далёка не лепшыя пазіцыі. Пракурор  раёна С. У. Зайцаў задаў дакладчыку пытанні, якія сведчаць пра недастатковы ўзровень работы супрацоўнікаў міліцыі па прафілактыцы цяжкіх і асабліва цяжкіх злачынстваў.
У прынятым рашэнні адзначана, што за мінулы год і за два месяцы бягучага года адбыліся станоўчыя зрухі па зніжэнні колькасці злачынстваў і правапарушэнняў на тэрыторыі раёна, як у цэлым, так і па асобных катэгорыях. Гэта дазволіла дэпутатам зняць пытанне з кантролю, але ў рашэнні вызначаны задачы па далейшай рабоце раённага аддзела ўнутраных спраў, іншых суб’ектаў прафілактыкі па паляпшэнні крымінагеннай сітуацыі ў раёне і павышэнні ўзроўню прафілактычнай работы.

Карэкціроўка бюджэту
Па трэцім пытанні парадку дня выступіла дэпутат раённага Савета дэпутатаў начальнік фінансавага аддзела райвыканкама А. С. Сідарэнка, якая прапанавала ўнесці карэктывы ў раённы бюджэт на 2016 год па асобных артыкулах. Дарэчы, такая карэкціроўка праводзіцца на працягу ўсяго года ў залежнасці ад аператыўных патрэб і эканамічнай сітуацыі. Дэпутаты зацвердзілі рашэнне аб ўнясенні змяненняў і дапаўненняў у рашэнне раённага Савета ад 24 снежня 2015 года №79.
Сяргей ЕРМАЛАЕЎ.